“Imi forma organizasaun illegal hanesan Rejime Suharto nia, tanba ne’e merese estadu nia kondenasaun ba imi” - Administradór Baucau.

.

Timor Hau Nian Doben - 29 de março de 2014

Dia 28 Marsu 2014 membru CPD-RDTL ema na’in 184 entrega an ba autoridade Estadu nia iha Suku Samalari Sub-Distrito Laga.

Serimónia entrega an ne’e marka prezensa husi administradór Distritu Baucau, Administradór Sub-Distrito Laga, Komandante Polísia Distrito Baucau, Komandante F-FDTL primeiru batallaun Baucau no autoridade local sira seluk.

Antes ne’e xefe Suku no xefe aldeia sira husu ba komunidade sira atu hatama sira nia naran no atributu sira ne’ebé durante ne’e sira uza ba atividade CPD-RDTL nia no husi avizu ne’e balun hatama duni, balun seidauk hatama nia naran no entrega atributu sira.

 Too serimónia entrega an ne’e akontese ohin, membru principal husi Konsellu Revolusaun Maubere ne’ebé Polísia ba atake iha Lalulai seidauk iha informasaun ruma atu entrega an.

 Ema principal sira ne’ebé General Lere fó sai nia naran iha komunikasaun social sira hanesan Koboy, Lemorai no Xefe Seribu’u Carlos seidauk hetan sira nia paradeiru dezde akontesimentu iha Lalulai dia dez liu ba.

Media sira mós seidauk konsege ko’alia ho sira razaun tanba sá sira kontinua hadook an husi autoridade Polísia no F-FDTL ne’ebé koko hakbesik an ba sira. Iha okaziaun ne’e Administradór Distrito Baucau hatete katak momentu akontesimentu iha Lalulai laiha kilat ida mak tarutu iha ne’ebá, granada mak tarutu ne’ebá tanba membru Konsellu Revolusaun Maubere mak tuda ba polísia maibé polísia nia kilat musan ida mós la sai no kilat la tarutu duni.

"Polísia ba baku no tuku imi tanba imi mak hakarak hodi konvida Polísia sira ba baku imi, se imi la tama ba grupu illegal maka polísia sei la baku no la tuku imi. Imi forma organizasaun hanesan rejime Soerharto nia, rejime ditadura nia tanba ne’e merese estadu nia kondenasaun ba imi", haktuir Administradór ne’e ba komunidade sira ne’ebé partisipa serimónia entrega an ne’e.

Komandante Polísia Distritu Baucau hatete katak PNTL agradese tanba imi bele entrega an maibé kontinua aviza ba sira ne’ebé seidauk entrega an tenke mai entrega an hodi ita servisu hamutuk ba dezenvolvimentu ita nia rai nia, Komandante ne’e mós haktuir katak saida mak liu ona husik ba liu ona no ami sei la uza akontesimentu iha Lalulai hanesan razaun ida atu mai baku ka estraga imi maibé bele mai entrega an de’it, haktuir komandante Polísia ne’e ba komunidade sira iha ne’ebé.

Komandante F-FDTL mós haktuir katak agora ba oin labele tan iha kilat tarutu maibé karik sala ruma ita nudár rezisténsia no Timor-oan tenke buka malu hodi ko’alia ba malu.

Too data agora populasaun sira seidauk rona katak F-FDTL no PNTL atu halo operasaun ba membru principal husi Konsellu Revolusaun Maubere ne’ebé seidauk hakarak atu entrega ba autoridade Estadu nia.

"Ami seidauk rona buat ruma kona ba operasaun ne’ebé sei halo husi Polísia no FDTL tanba ne’e segredu sira nia, ami labele hatene" , haktuir komunidade ida ne’ebé lakohi publika nia naran.

.