"FRETILIN Rejeita Kandidatu Uniku Ba KAK, PN Sei Ko'alia Ho Governu"

.

Jornal Independente - Sesta-feira, 07 Marsu 2014

 Bancada FRETILIN iha Parlamentu Nasional la konkorda ho desizaun Governu nian hodi aprezenta de'it uniku kandidatu ba uma fukun hodi hili nia sai Komisariu Komisaun Anti Korupsaun (KAK).

Konsellu Ministru Desidi ona Sergio Hornai nu'udar kandidatu Uniku ba Komisariu KAK hodi troka Aderito de Jesus no aprezenta ona ba PN.

Desizaun Governu nia ne'e hetan protesta maka'as husi Bancada FRETILIN horseik, tanba la reflete ho prinsipiu demokrasia. Partidu opozisaun ne'e husu ba Governu atu diak liu aumenta numeru kandidatu atu nune'e parlamentu bele halo selesuan liu husi votasaun.

"Governu haruka de'it kandidatu ida, ami sente la diak tanba la dun elegansia kuandu Parlamentu halo votasaun tanba ne'e ami nia bancada husu Governu atu aumenta tan kandidatu liu ema nain ida," dehan Vice prezidenti Bancada FRETILIN, Francisco Miranda Branco iha uma fukun PN.

Ba pozisaun FRETILIN nian ne'e, meza PN promete sei koalia ho parte Governu. "Ami sei haree fali hodi komunika ba ezekutivu (Governu) kona ba aspirasaun ezizensia Bancada FRETILIN, atu Governu aprezenta mas liu ema ida," dehan Vice prezidenti PN," Aderito Hugo da Costa.

Nia dehan, PN seidauk determina loron ba eleisaun Komisariu foun, tanba sei presiza koalia ho Governu kona-ba preokupasuan FRETILIN nian. Entertantu, Vise prezidenti Komisaun A ne'ebe toma konta ba asuntu Justisa, Lei, no Anti Korupsaun, Arao Noe de jesus dehan, presiza duni governu aumenta tan kandidatura atu nune'e labele iha violasaun ne'ebe mak membru PN halo.

Iha momentu ne'ebe iha kandidatu nain tolu, hanesan Aderito de jesus, Ivo valente no Sebastiao Dias Ximenes.

.