“CPD-RDTL No KRM Taka Estrada Ligasaun Laga-Baguia”

.

Jornal Nacional Diario - Kuarta-feira, 12 Marsu 2014

Movimentu transporte dirasaun sub Distritu Laga no Baguia, Distritu baucau, kontinua paradu total, tanba grupu Consellu Popular Demokratika Republika Demokratika Timor-Leste (CPD-RDTL) no Konsellu Revolusaun Maubere (KRM), tesi tun tiha ai hun boot sira iha estrada ninin hodi taka estrada publiku.

Aktu taka estrada ligasaun Laga-Baguia ne’e akontese desde segunda to’o Tersa feira ne’e, (10-11/3/2014), wainhira iha operasaun Polisia Nasional Timor Leste (PNTL) hasoru grupu CPD-RDTL no KRM, iha Aldeia lalulai, Suku sagadate, Sub Distritu Laga, Distritu Baucau.

“Administrador Sub Distritu baguia informa mai hau katak, husi parte Lavateri ninia sira komesa taka fila fali dalan iha area samalari nian, sira koa has, kulu no mos ai hun boot sira, neebe mak ohin dader sira tesi hodi taka dalan, iha area Samalari no area saelari nian,” informa komandante Polisia Distritu Baucau, Superitendenti Xefi, Jose Neto Mook ba Jornal Nacional Diario, Tersa, (11/3) iha Kuartel PNTL Baucau, Vila Nova.

Jose Neto hateten katak, alende area lavateri, Sub Distritu baguia mai Baucau to’o agora seidauk la’o tanba dalan taka.

“Entaun fo impkatu boot ba sira, ho ida ne’e mak ohin ita fo apoiu ba forsa sira atu bele mai asegura seguransa area Samalari nian, tanba ne’e ita nia forsa sira sei ba haree fatin atu hela ba,” tenik nia.

Iha fatin ketak, Administrador Distritu Baucau, Antonio A, Guterres hateten katak, situasaun ne’ebe ligadu ho operasaun husi PNTL ne’ebe mak halo iha lalulai no oras ne’e dalan kontinua taka I kuntidade polisia atu halo seguransa ne’e, seidauk to’o atu asegura situasaun ne’e to’o iha fatin sira ne’e.

Entertantu, Xefe Suku Samalari, Joao de Deus Xavier hateten katak, iha informasaun pasazeirus husi baguia nian dehan katak, movimentu transporte labele liu ba baguia, tanba ai hun bobot sira ne’ebe besik estrada sira tesi hotu hodi taka estrada no too agora mos sira kontinua halo kontrola ba fatin entre Samalari no Saelari.

Entertantu, pasajeirus Erminia Ximenes hateten katak, komesa horseik kedas kareta ba baguia la halai to’o agora, tamba impaktu husi operasaun ne’ebe mak halo iha area Lalulai nian, nia senti triste tebes tanba nia husi baguia mai bazaar iha Baucau atu ba fali Baguia, maibe kareta labele liu, nune’e nia labele fila ba ninia uma.

Nia haktuir tan katak, kalan rua ona nia toba deit iha terminal Baukau inklui mos pasajeirus seluk tanba sira la bele ba Baguia.

,