Advogado Fiar L7 Seida’uk Halo Krime Mas MP Mak Preokupa Halo Prevensaun

.

Foto de, Tempo Semanal

Tempo Semanal – Dili, 14/03/2014

Advogado Pedro Aparicio ne’ebe defende Cornelio Gama L7 hateten julgamentu ohin ne’e hanesan primeiru interogatoriu husi Tribunal Distrital dili hodi halo Fiskalizasaun ba mandatu de detensaun no mandatu de buska no aban (15/03) tuku rua ho balun maka tribunal sei deside medidas ba ninia kliente ne’ebe mos hanesan eis segundu komandante Rejiaun de Gerilia 3 no ulun bo’ot ba sagrada familias.

“Sim julgamentu ohin ne’e bolu dehan Hearing. Hearing ne’e atu fiskaliza kona ba mandate detensaun ho mandatu ba buska ninian,” dehan Perdo Aparicio.

Nia haklaken katak, “husi Primeiru Interogatoriu ne’e maka bele hare asaun ne’e maka bele hare katak asaun ne’ebe maka arguido sira hanesan Mauk Moruk ho L7 ho komandante Labarik, sira nia hahalok ne’e tama ba krime ida grave ga ou la’e? Hare husi ninia natureza krime ne’e maka depois sei deside katak sira ne’e presiza tama iha prizaun preventivas ga ou iha liur de’it. Ne’e maka objetivu husi primeiru interogatoriu ne’e. Ne’ebe julgamentu ida ohin ne’e hotu tiha ona I aban lokraik tuku rua ho balun maka foin rona desizaun husi Tribunal kona ba medidas saida maka aplika ba arguido sira ne’e. Karik mediadas prizaun preventivas ga, karik medidas prizaun domisiliaru ga ou aprezenta aan iha autoridade polisial ho prokurador nia oin de’it ga ou aplika TIR. Ida ne’e aban tuku rua ho balun maka foti desizaun.”

“Akuzasaun ba sira maka hanesan sira deskonfia komete iha krime asosiasaun kriminoja, uzurbasaun da fungsoeins, uza uniforme ou farda iha Publiku I alterasaun ba estadu de direitu, krime hat ne’e maka akuza iha arguido sira. Maibe iha primeiru interogatoriu ne’e, ita so atu hatene de’it mandate detensaun I buska domisiliariu i rona lei ilegal ga la’e, polisia ezekuta di’ak ga la’e I aktu sira ne’e tama iha krime Kaman ga la’e ne’e maka determina medidas sa maka sei aplika ba arguido sira,” esplika advogado ba eis deputadu L7.

Pedro Aparicio defende katak ninia parte fiar mos nia kliente sala la iha. “Problema ida ne’ene ha’u hare hanesan Ministeiru Publiku maka preokupa liu. Tan ba iha kazu ida ne’ene, sira foin maka hanesan halo de’it konferensia Pers. Husi konferensia Pers ne’e maka prokurador sira hare katak iha tendensias bele halai ba iha krime I iha mos tendensias bele afeta ba iha estabilidade ne’e. Ne’e duni maka sira halo antisipasaun ida para futuru ne’e ema seluk labele monu tuir lasu maka bele halo bu’at ruma ne’ebe bele afeta ba estabilidade ne’e.”

Nia kontinua esplika katak, “ha’u hanoin iha prosesu ida ne’e, sira foin maka halo konferensia pers, ida ne’e direitu ne’ebe konsagra iha konstituisaun katak ema bele hato’o ninia opiniaun, halo kritikas hasoru autoridade publiku sira ho mos halo petisaun bu’at sira ne’e. Maibe importante maka iha terenu ne’e labele halo krime. Se iha terenu la iha krime no bu’at sira ne’e hotu entaun labele dehan sira ne’e perigozu ona no sira ne’e hanesan halo desturbiu ona ba iha trankuilidade publika.”

“Seida’uk, seida’uk prienxe rekexitus katak sira ne’e komete iha krime,” dehan Pedro Aparicio.

Husu kona ba karik nia fiar aan katak iha desizaun aban ne’e sei liberta ninia kliente maibe Pedro dehan nia sei la komenta no lakohi hamosu espekusaun maibe importante maka hanesan advogado id aba L7 nia konsege ona hala’o ninia kna’ar hodi defende.

“Importnate maka ami advogado bele defende ho maximu I ami hato’o bu’at hotu-hotu ba Tribunal depois maka Tribunal konsidera ami nia defeza ne’e maka sira foin foti desizaun ida ne’ebe maka di’ak.

Tuir Pedro informa katak ninia kliente agora daudaun sei kastigu hela iha sela PNTL distrital Dili ninian no la viola lei tan ba iha mandatu de kapturasaun husi Ministeiru publiku I antes setenta duas oras ne’e aprezenta ona ba iha Tribunal hodi halo fiskalizaun ba mandatu de detendaun ho buska ne’e la’o tuir kodeku penal ou la’e fiskaliza atuasaun PNTL iha sira nia servisu la’o di’ak duni ou la’e. Pedro esplika katak Polisia sira hala’o sira nia servisu ho di’ak tebes hodiseik no sira trata ema ho umanidade maske ninia kliente iha mandatu kapturasaun.

Tuir informasaun ne’ebe Tempo Semanal simu husi parte PNTL iha kuartel PNTL distritu dili dehan daudaun ne’e iha ema dadur nain sanolu resin neen mai husi CPD-RDTL no Konselho Revolusaun Maubere maka iha hela sela polisia nia laran.

.