"Xanana Rezigna An Koligasaun Monu"

.

Jornal Nacional Diario - Tersa-feira, 04 Fevereiru 2014 

Konsultoria Juridicia e Financeira, Dr. Manuel Tilman katak, konstituisaun artigu 112 alinea B katak, wainhira Primeiru Ministru (PM) rezigna an Governu monu no mos bloku Koligasaun monu. 

Antes ne'e mosu opiniaun publiku katak PM Xanana Gusmao rezigna an, Governu monu no Prezidenti Republika konsulta fali partido koligasaun aprezenta fali kandidatu Primeiru Ministru foun. 

 Eis deputado Partidu KOTA ne'e dehan, ohin loron ne'e CNRT ho FRETILIN haree malu diak, tan ne'e bele partidu rua ne'e konkorda malu hodi halo revizaun konstituisaun hodi muda sistema ne'ebe iha ona antes ne'e. "CNRT ho FRETILIN bele konkorda malu katak antes to'o 2017, halo revizaun ba konstituisaun e revizaun ba konstituisaun ne'e dehan sira sei bele deskuti ita nia sistema ida be semi prezidensial ne'ebe bele tama ba prezidensializmu katak, Prezidente da Republika, bele mos kaer hotu governu, keta ida ne'e mak mudansa ne'ebe boot iha nasaun Timor Leste ne'e, antes eleisaun 2017, tanba ne'e, kuandu hanesan ne'e ona, eleisaun antisipada sei la mosu. Posiblidade rezignasaun Primeiru Ministru Xanana Gusmao nian ne'e Timor Leste (TL) uza fila fali sistema semi prezidensial," eis Prezidenti Partidu KOTA, Manuel Tilman ba JNDiario sesta (31/01) foin lalais ne'e iha nia knaar fatin Beach Garden Pantai kelapa Dili. 

Nia dehan, karik husi rezignasaun PM Xanana ne'e mak atu halo mudansa ba sistema refere antes eleisaun 2017, tanba ne'e kuandu hanesan nee ona, eleisuan antisipada sei la mosu. "Mudansa ida be rejime ne'e, karik ita atu sai husi semi prezidensial ba fali prezidensializmu ho konsensu, sestu governu ho konsensu no demisaun kintu governu mos ho konsensu maioritar iha Parlamentu," akresenta Manuel Tilman. 

Haklean nia katak, kintu governu ohin loron ne'e la fo solusaun ba problema ne'ebe mak nasaun hasoru, tanba governu boot demais fo todan mos ba orsamentu deit maibe laiha impaktu ba povu ninia moris. 

 Eis Deputadu manuel tilman dehan, karik CNRT ho FRETILIN atu halo koligasaun ho intensaun atu rezolve problema ne'ebe mak durante ne'e nasaun hasoru ladauk rezolve, tanba ho Kintu Governu ne'e PM xanana la konsege halo buat balun hahu husi prezidenti to'o mai kaer fila fali kargu primeiru Ministru, maske nune'e eis deputadu ne'e mos la esplika klaru sa los mak la dauk halo. 

"PM Xanana ninia hanoin sira ne'ebe la konsege halo husi nia kargu ida uluk Prezidente ne'e to'o agora Primeiru Ministru ne'e bele realiza, tur hamutuk ona ho FRETILIN, sestu governu ne'ebe mak sei mai ne'e mak politika de governu reformuladu, tanba konsensu ho FRETILIN i sestu Governu ne'e, laos remodelasaun kintu governu, mais laos atu mosu eleisaun, maibe sei liu husi koligasaun maioria," dehan Tilman. 

.