"Sergio Lobo Husu Evidensia Ba PN"

.

Jornal Nacional Diario - Kinta-feira, 27 Fevereiru 2014

Ministru Saude, Sergio Lobo husu evidensia ba membru Parlamentu Nasional nebe deskonfia katak nia halo mal jestaun no konflitu interese relasiona ho kazu serviso Autonomo Medikamentus Ekipamentus Saude (SAMES) la sosa ona aimoruk maibe Ministru saude entrega fali ba kompania Istana farmasia Grup Lda, ne'ebe nudar Ministru Saude nia alin mak sosa aimoruk hodi fornese ba Hospital no Centru Saude sira iha Timor laran tomak. 

Ministru Saude Dr. Sergio Lobo hatete nia lahatene kona ba saida mak PN sira hatete katak nia oferese kompras aimoruk ba nia alin, tamba ne'e nia husu ba PN atu hatudu evidensia. "Hau lahatene, husu ba sira tanba hau lahatene kona ba saida mak sira koalia, bah au nia alin ida ne'ebe? 

Haruka sira hatudu evidensia," dehan MS Sergio Lobo ba Jornalista sira iha HNGV Bidau (26/2) depois de enkontru ho lideransa sira HNGV nian. Sergio Lobo hatete nia pronto atu ba hatan iha Tribunal bainhira evidensia forte tanba ne'e labele koalia deit maibe tenki hatudu evidensia atu nune'e bele hatene nia alin ida ne'ebe?. 

"Hau la hatene hau nia alin ida ne'ebe? Se evidensia forte hatudu ona hau pronto ba hatan iha Tribunal," koalia Sergio Lobo hodi dezafia depurado sira. 

Nia hateten falta ekipamentus dala barak sai preokupasuan ema hotu nian porizemplo Parlamentu nasional, komunidade bai-bain inklui familia pasiente dala barak kestiaona maibe tenke haree no hatene katak HNGV salva ema nain hira no halo ona buat lubuk ida," dehan nia. 

Lobo mos hateten pronto atu hasoru parlamentu Nasional iha Tersafeira semana ne'e hodi esplika ba PN kona ba preokupasuan ne'ebe deputadu sira hato'o iha Plenaria PN. 

"Tersa feiras semana oin hau sei hasoru sira PN,' dehan nia. Nia hateten, durante ne'e PN sempre haruka nia atu rezigna an tanba Parlamentu mak desidi hodi nia sai Ministru, nune'e karik PN ejiji atu nia rejigna an, nia sei rejigna an. 

"Hau pronto rezigna an tanba PN mak hili hau entaun hau pronto atu rezigna an karik sira husu hau rezigna an," Sergio dehan ho espresaun oin hamnasa. 

.