"PN Konsidera Sergio Lobo Komete Mal Administrasaun"

.

Jornal Nacional Diario - Kuarta-feira, 26 Fevereiru 2014 

Bancada FRETILIN husu ba Governu atu demiti no investiga Ministru saude Sergio Lobo, tanba konsidera komete mal administrasaun, no konflitu de interese, hodi hapara funsaun servisu Autonomo Medikamentus no Ekipamentus Saude (SAMES), Sosa Aimoruk, hodi oferese ba Hospital no sentru saude sira, hodi intrega falo ba kompania Istana Group, Lda, ne'ebe nuudar Ministru Sergio ninia alin mak nain ba kompania ne'e. 

Deputada Bancada FRETILIN Maria Angelica Rangel da Cruz, levanta kestaun ne'e iha uma fukun Parlamentu nasional (PN) Tersa (25/2), hateten katak, SAMES nia funsaun ne'ebe mak durante ne'e, sosa aimoruk, rai aimoruk iha armazen no halo distribuisaun aimoruk ba hospitais no sentru saude sira, maibe depois Ministru saude hapara kontratu ne'e, agora dadauk SAMES halo deit kna'ar rua mak hanesan rai aimoruk no distribui aimoruk. 

"Maibe sosa aimoruk ne'e agora sentraliza tiha ona iha departementu Farmasia Ministeriu saude nian hodi kontrolu husi Ministru saude Sergio Lobo," hateten deputada Maria Angelica iha nia deklarasaun politika, iha plenaria Tersa (25/2). Maria Angelica akresenta katak, Ministru Saude Dr. Sergio Lobo, hapara funsaun servisu Autonomu Medikamentus no Ekipamentus da saude (SAMES) ho razaun atu labele hola aimoruk, tanba nia halo ona ajudikasaun ba Kompania Istana Group Lda, ne'ebe Ministru nia alin rasik mak hanesan nain ba Kompania ne'e mak hola fali aimoruk. 

"Bazeia ba faktus ne'ebe ami foti, Bankada FRETILIN ejiji ba Governu atu demiti Ministru saude Sergio Lobo hodi halo investigasaun klean ba faktus hirak ne'ebe mak iha," Maria Angelica akresenta. 

Deputada husi bancada FRETILIN ne'e dehan, iha ona pedidu kanselamentu kontratu ba kompania Istana Group, Lda, husi diresaun jestaun Finansas no aprovizionamentu husi Ministeriu saude ba Ministru Dr. Sergio Lobo, maibe Ministru lakohi rona pariser tekniku husi servisu kompetente, aprovizionamentu MS nian, hodi kontinua halao tuir nia desizuan rasik. 

Aleinde ne'e mos, deputada ne'e deklara katak, iha prosesu rekrutamentu bolsa estudu ba Kediri Indonesia, no mos rekrutamentu ba funsionariu MS nian iha indikasaun nepotismu maka'as. "Nune'e mos rekrutamentu ba asesores nasional no internasional sira mos la tuir prosesu rekrutamentu, tanba barak mak Ministru saude bolu diretamente ba asina akordu," Maria Angelica dehan. 

 Deputada ne'e mos haklaken katak, durante ne'e Ministru saude rasik mak sai ba liur hodi halo engosiasaun no sosa aimoruk, ekipamentus medikus no material ho kompania sira. 

"Iha realidade kada projeitu iha komisaun rasik hodi halo aprovizionamentu, maibe Ministru mos halo intervensaun maka'as iha kondisiona situasuan hodi taka dalan atu membru sira la hetan esperensia maske memebru sira ne'e Ministru nia ema," katak Maria Angelica. 

Deputada ne'e informa mos katak, bainhira iha alokasaun orsamentu ba projeitu ida ho osan U$500 mil tuir lei haruka tenke submete uluk ba Tribunal de kontas hafoin bele ezekuta. 

Maria Angelica mos deklara katak, nia parte levanta kestaun sira ne'e, laos liafuan mamuk deit para halo retorika politika, maibe iha duni faktus. 

"Nune'e depois halo investigasaun mak ami hatudu faktus sira ne'e, tanba ne'e tuir ami nia haree, hahalok ne'e krime atu ital abele tolera hodi eziste iha ita nia nasaun ida ne'e," deputada Maria Angelica Fundamenta. 

Iha fatin hanesan, Xefi bancada CNRT deputadu Natalino dos santos hateten katak, apoiu deklarasaun politika ne'ebe hato'o husi Bancada FRETILIN, tanba ne'e importante tebe-tebes atu haree didiak kestaun saude publiku. 

Deputadu husi CNRT ne'e dehan, bainhira saude publiku mak la lao ba oin, dezenvolvimentu mos lao la dun diak, tanba saude ne'e importante liu katak, ema barak mak saude la diak hodi transfere ba halo tratamentu iha rai liur no Governu tenki hasai no gasta osamentu barak. 

Tanba ne'e deputadu natalino dos santos husu, ba Ministeriu saude atu jere jestaun ne'e ho didiak no kontrolu failansu sira ne'ebe mak akontese iha Ministeriu saude ne'ebe durante ne'e Publiku kestiaona beibeik.

.