"PJR: Kazu Emilia Iha Prosesu Investigasaun"

.

Jornal Independente -Segunda-feira, 24 Fevereiru 2014 

Prokurador Jerald a Republika (PGR), Jose Ximenes hateten, Kazu Eis Ministru Edukasaun Joao Cancio no Emilia Pires atual Ministra Financas (MF) oras ne'e sei iha prosesu investigasuan. Tan ne'e, nia dehan kazu indikasaun Korrupsaun ne'e seidauk bele fo sai ninia rejultadu ba publiku. 

"Kazu eis Ministru Edukasaun Joao Cancio ho Minitra Emilia Pires sei iha hela prosesu investigasaun nian laran, tanba ne'e seidauk bele fo sai kona ba rezultadu husi kazu ne'e," hateten Prokurador Jeral Republika Jose ba Jornalista sira iha Hotel Timor, foin lalais ne'e. tuir akuzasaun, Eis Ministru Edukasaun Joao Cancio Freitas deskonfia envolve halo korrupsaun iha prosesu harii televizaun Edukasaun iha Governasaun aliansa Maioria Parlamentar (AMP). 

Nune'e mos ba kazu Ministra Financas (MF), Emilia Pires ne'ebe deskonfia aprova orsamentu ba nia kaben Waren Mcleod nu'udar Diretor kompania Mac's Metal Craft hodi fornese kama ba HNGV iha tinan 2012. Iha parte seluk, Xefi Sesaun Krime Tribunal Distrital Dili Julio Ribeiro hatete, relatoriu kazu eis Ministru Edukasaun (ME) Joao Cancio Freitas nia seidauk to'o ba nia seksaun, maibe nia lakohi fo sai kona ba orariu julgamentu ba kazu ne'e. 

 Iha kestaun sleuk, tuir informasaun ne'ebe mak diario ne'e asesu katak, Ministra Financas Emilia Pires oras ne'e laiha Timor-Leste, iha semana hirak ba kotuk, nia konsege halao nia servisu durante loron rua iha nia Ministeriu no fila hikas fali ba Australia hodi halo tratamentu saude. Nune'e mos, iha loron segunda 17 fulan-Fevereiru, Ministra Emilia Pires hasoru malu ho Primeiru Ministru Kay Rala Xanana Gusmao durante loron ida tomak, maibe tuir fonte iha palasio Governu ida katak, nia lahatene saida mak membru governu nain rua ne'e deskute. 

Kona ba moras saida mak Ministra Emilia sofre, tuir fonte konfirmadu iha edifisiu Ministeriu Financas haktuir katak, ida ne'e nia la hatene ida, maibe nia hatene duni katak Ministra Emilia bad uni iha Australia atu halo tratamentu ba nia saude rasik. 

Antes ne'e, molok tama ba iha loron diskusaun Orsamentu Jeral Estadu (OJE) 2014, Ministra Emilia rasik husu tiha ona lisensa hodi ba halo tratamentu iha Australia. 

Tanba ne'e, iha momentu diskusaun ba OJE 2014 ne'e rasik, Ministra Emilia Pires la marka prezensa iha plenaria PN. 

Relasiona ho lisensa ne'ebe mak Ministra Emilia Pires pasa hela ne'e, maioria informasaun ne'ebe mak espalha ona iha publiku hateten katak, Ministra Emilia tuir planu atu rejigna an ona antes re-estrutura ne'e mosu.

.