"Orsamentu ba Dezenvolvimentu ZEE Oecusse Ki'ik"

.

Jornal Independente - Tersa-feira, 04 Fevereiru 2014

Eis Primeiru Ministru Dr. Mari Alkatiri ne'ebe hetan fiar husi Governu hodi kaer planu Zona Ekonomia Especial (ZEE) Oecusse ho montante osan tokon $20 ki'ik, tanba orsamentu ne'e la sufisiente hodi halo projeitu boot iha Distritu Enklave.

Tuir Alkatiri, kuandu atu halo projeitu ruma presiza osan no projetu boot ida hanesan Zona Ekonomia Espesial (ZEE) Oekusi ne'e, dala barak presiza finansiamentu ne'ebe boot.

"Ita haree ba osan ne'ebe tau ho montante tokon $20 ne'e ema barak dehan osan ne'e boot tebes," dehan nia, iha Timor Plaza (31/1). Nia dehan, osan ne'e rasik atu utiliza ba Zona Ekonomia Especial Oecusse tenki hahu uluk lai konstrusaun ba estrada.

"Osan ne'e se ita komesa haree katak, tenki servisu iha estrada, kilometru 40 ne'e osan ne'ebe tau iha tinan ne'e la to'o ba estrada kilometru 40 ne'e," tenik Alkatiri. Alende kona-ba estrada kilometru 40, kuandu atu haree fila fali ba atu hadia tan aeroportu osan ne'e la to'o liutan, inklui bee moos no eletrisidade.

Tuir Alkatiri, kuandu osan ho montante tokon U$20 ne'e rasik aloka ba iha projeitu ne'e, deputadu sira dehan osan ne'e maka'as tebes, maibe tuir loloos la to'o.

"Sira dehan tamba sa osan oekuse simu bar-barak, distritu sira seluk la simu osan barak hanesan ne'e no hau esplika tiha ona ba PN," dehan Alkatiri. Nune'e, Alkatiri mos halo komparasaun, haree deit ba sentru eletrisidade pruzemplo Betano ho Hera ninia ne'e tokon $100 resin, ne'e hanesan fahe distritu 12 ne'e, ida deit simu ona tokon $1,3, ba deit iha eletrisidade.

 "Oekuse simu saida, foin tokon $20, hotu-hotu komesa hakilar, mas portantu, ida ne'e normal kuandu ita atu harii buat foun mai, hanesan uluk kedas nune'e hela deit, kuandu atu lori buat foun mai balun apoiu balun la apoia, depois kuandu rezultadu komesa iha ona mak hotu-hotu komesa apoiu," haktuir alkatiri. Biar nune'e, Alkatiri dehan, iha konsensu tanba Prezidenti republika, Primeiru Ministru fo apoiu tomak no iha PN mos barak mak fo apoiu. "consensus ne'e fo kbiit ba se mak atu lidera projeitu ne'e atu lao lalais liu tan, nune'e iha tinan 2014-2015 sasan barak sei akontese iha oekuse," garante Alkatiri.

Entertantu, kona ba dekretu lei ne'ebe atu fo garantia ba projetu no investidor sira husi rai liur mai hodi investe iha Zona Ekonomia especial Oekuse nian, Alkatiri hateten, hein primeiru Ministru xanana Gusmao fila husi rai liur mak aprova dekretu lei ida kria autoridade reguladora.

.