"Ohin Lansamentu Fatuk Dahuluk 'Master Plan' Oekusi"

.

Jornal Independente - Sesta-feira, 07 Fevereiru 2014 

Governu Timor-Leste tuir planu ohin, sesta (07/2), sei hala'o serimonia lansamentu fatuk dahuluk ba implementasaun Zona Eskonomia Espesial iha Merkadu (ZEEM) iha Distritu Oecusse ka konesidu liu ho naran Master Plan. 

Maski lei ba Zona Espesial ne'e seidauk iha maibe Governu liu husi Orsamentu Jeral estadu 2014 ne'ebe Parlamentu nasional (PN) aprova ho promulga husi Prezidenti Republika, aloka osan hamutuk millaun U$22.900 ba implementasaun ZEEM. 

Ba implementasaun projetu ne'e, deputadu sira iha Parlamentu nasional konkorda ho razaun ZEEM sei fo benefisiu no retornu ba komunidade Oecusse, inklui Povu Timor-Leste tomak. 

Vise prezidenti PN Adriano do Nascimento hatete, lei ba implementasaun ZEEM ne'e sei hala'o no iha tempu badak governu sei aprejenta mai iha PN atu halo aprovasaun. 

"Ami apoia inisiativa politika, kretaividade politika atu dada investor, ne'ebe ita apoiu, lei ita mak halo, importante ita lansa lai ideas ne'e no lansa lai ita nia kreatividade," dehan nia iha PN (06/2). 

Lansamentu ne'e, Tuir Adriano, hatudu komitmentu Timor Leste ba programa no planu ne'ebe halo ba dezenvolvimentu nasional. Adriano hatutan, Banku Mundial no investor barak mak iha komitmentu atu investe tanba ne'e TL tenke lansa tiha uluk mak halo lei mos diak. Iha fatin hanesan, Vice Prezidenti Komisaun A asuntu Justica, Administrasaun Publika, Poder lokal no Anti Korupsaun Arao Noe de Jesus hateten, Programa lansamentu ba ZEEM ne'e importante tebes. 

"Tinan ne'e nia laran sei halo preparasaun lei antes Primeiru Ministru Xanana Gusmao rezigna an husi nia kargu, tanba ne'e ita fo apoiu atu halo uluk lansamentu ba programa ne'e," dehan Arao. Aleinde ne'e, Sekretariu Estadu Asuntu Parlamentar Maria Terezinha Viegas dehan, iha ona projetu lei ne'ebe Konsellu Ministru haree no deskute ba ZEEM. 

"Lei atu regula Zona Ekonomia Espesial iha merkadu oecusse nian ita hein Prezidensia Konsellu Ministru atu submete ba iha reuniaun Konsellu Ministru atu halo apresiasaun final," dehan Terezinha. 

Hafoin KM aprova, nia dehan, Primeiru Ministru no Ministeriu ne'ebe mak ezekuta halo asinatura mak foin bele submete ba Parlamentu Nasional. 

.