"KAK Rekonese Susar Kombate Korrupsaun"

.

Jornal Independente -Sesta-feira, 07 Fevereiru 2014 

Servisu no esfosu barak mak durante ne'e Komisaun Anti Korupsaun (KAK) halo ona hodi investiga kazu Korrupsaun, Koluzaun no Nepotizmu (KKN), maibe sente susar oituan bainhira laiha koopersaun servisu ho entidades hotu-hotu. 

Nune'e, KAK mos laos super ne'ebe bele hatene buat hotu-hotu, ne'e duni, tenke servisu hamutuk ho ajensia estadu nian hodi bele haree kazu korrupsaun ne'ebe mosu iha nasaun ne'e. Komisaun KAK, Aderito de Jesus Soares hateten, KAK tenke halo komunikasaun diak ho Ministeriu Publiku no mos media sira, tanba, ne'e nudar esforsu ida husi kombate korrupsaun. 

Nia esplika katak, komunikasaun KAK ho ajensia husi estadu tomak hodi bele haree servisu ne'e tanba la'os KAK nia servisu de'it, maibe ema hotu nia servisu. 

"Ita tenke muda ema nia kakutak, tanba komate Korupsaun ne'e la'os KAK nia servisu deit, KAK halo servisu importante balun maibe kombate korrupsaun tenke mai husi sosieade tomak no mos ema sira ne'ebe kaer ukun," dehan Aderito, iha Emabixada EUA, Praia Kokerus-Dili (06/02). 

Nia haktuir katak, kuandu sira la koopera mos problema ba KAK nafatin, tamba hatama ema ba kadeia maibe laiha impaktu ba sistema. 

Nia dehan, estratejia investigasaun ba kriminal la'o maibe prevensaun mos kontinua lao nafatin atu hasa'e ema nia konxiensia ba lala'ok korupsaun, konxiensia katak, ema hatoo keixa ba KAK bainhira kazu korrupsaun ne'e akontese. Planu ba tinan ne'e sira sei reforsa nafatin rede rai laran no mos iha rai liur.

Tanba KAK atu hasa'e membru ninia kapasidade, ne'e duni kada tinan sei haruka nafatin, maibe maluk sira investigador seluk atu haruka tuir formasaun iha rai liur hanesan Singapura, Hongkong no Malazia. 

,