Intervein Servisu KAK, "Asosiasaun HAK Kontra PM Xanana"

.

Jornal Nacional Diario - Kinta-feira, 27 Fevereiru 2014 

Sosieade sivil kontra maka'as Primeiru Ministru Kay Rala Xanana Gusmao, tanba konsidera halo intervensaun ba servisu Komisaun Anti Korupsaun (KAK). 

Diretor ezekutivu Asosiasaun HAK, Manuel Monteiro hateten, atu kombate korusaun iha Timor-Leste presiza duni kolaborasaun entre sosiedade hotu-hotu, maibe ukun nain sira lalika intervein servisu KAK nian. 

"Intervensaun politika husi lider politku sira ne'e mos bele hafraku fila fali Komisuan Anti Korrupsaun nia servisu," dehan nia iha nia knaar fatin, farol, Dili, horsehik. 

Tuir nia, intevensaun politika ne'ebe xefe Governu halo amate mos espiritu nasuan ne'e nian atu kombate korupsaun, Koluzaun no nepotizmu (KKN). 

Tuir monitorizasaun Asosiasaun HAK, PM Xanana hasai beibeik lian kroat hodi hasoru KAK ne'ebe husu ba instituisaun independente ne'e brani karik tenki investiga nia. 

"Ita nia Primeiru Ministru dehan haruka KAK nonok.....brani karik mai investiga hau (PM Xanana), ita hotu rona publiku hotu rona ne'ebe ita hotu hakfodak tanba PM Xanana mak harii KAK no nia rasik mak iha hanoin atu kaer korruptu sira lolos tenki kaer, maibe iha sorin seluk PM mos defende koruptu," dehan Manuel. 

Direktor HAK ne'e dehan, PM Xanana hanesan xefe Governu lakohi husik nia Ministru ida ne'ebe deskonfia komete KKN atu Komisaun Anti Korupsaun bolu hodi investiga, ne'e duni sempre defende beibeik. 

"Se PM Xanana dehan nia membru Ministru ida la sala, husik KAK halo investigasaun lai ba, se laiha evidensia bele fila, maibe labele taka dalan hodi halo deklarasaun politika hodi afraku fila fali servisu KAK nian," nia lamenta. 

Nee duni husu ba governante sira atu respeita no hala'o servisu tuir konstituisaun RDTL, tanba, iha konstituisaun define klaru ona kona-ba separasaun servisu kada orgaun estadu nian. Antes ne'e, PM Xanana dehan servisu KAK dadaun ne'e bolu nia diretor sira ba hotu KAK, ne'ebe diretor balun atu lakohi servisu. 

"Hau nia diretor barak mak ba ona hata'an iha KAK ne'ebe sira mai husu dehan ami lakohi ona servisu, tanba KAK bolu ba mai deit," dehan PM Xanana. 

Aleinde ne'e, PM Xanana mos kestiaona servisu KAK bainhira KAK bolu PM Xanana ba hataan iha KAK kona-ba projetu ponte komoro ne'ebe kondisaun diak mas sobu no ho montante orsamentu tokon U$16. 

.