"Indonezia Sei Deporta Timoroan"

.

Jornal Independente - Kuarta-feira, 26 Fevereiru 2014 

Governu Indonezia hahu ona verifika dadus kona ba Timoroan ne'ebe hela iha Indonezia hodi deporta fila mai Timor-Leste, relasiona ho eleisaun Prezidensial ne'ebe tuir kalendariu politika sei hala'o iha loron 9 Abril tinan ne'e. 

Lideransa komunitariu husi Suku Silawan, Sub Distritu Belu, Distritu NTT, hahu ona halo verifikasaun ba sidadaun Timor oan ne'ebe hela iha area ne'e atu deporta fila mai TL. Xefe Suku Silawan, Ferdy Moyes hateten, Governu lokal lakohi atu buat ruma atrapalla eleisaun ne'ebe sei halo iha loron 9 Abril, ne'e duni sira verifika ona Timoroan atu deporta fila ba nia rain (TL). 

 "Ami lakohi atu buat ruma atrapallha, liu-liu antes atu tama ba eleisaun," dehan Ferdy, ne'ebe Diariu ne'e sita husi Jakarta Post. Nia hatutan, Indonesia liuliu Tentara Nasional Indonesia (TNI) iha area Fronteira, autoridade lokal, membru governu, no lider Igreija nian mos halao operasaun ba Timor oan sira ne'ebe hela iha suku ne'e. 

Nia hatutan, iha sidadaun Timor barak mak tama ba sira nia suku uza Border Pass (Lintas batas), maibe la fo konesmentu ba Governu lokal. "Hau sei haruka sira fila hotu liu husi deportasaun," dehan Ferdy. 

Nia dehan, depostasaun ne'e sei halo ba Timor oan ne'ebe laos sidadaun Indonesia, maibe tama ba hela no nia familia sira iha Indonesia. 

.