"Igreja Katolika Tau Laran Ba Lu-Olo Hamorin TL Iha Mundu"

,

Jornal Independente -Kinta-feira, 06 Fevereiru 2014 

Igreja Katolika Timor-Leste tau esperansa boot no fiar ba eis Prezidente Parlamentu nasional (PN), Francisco Guterres 'Lu-Olo' ne'ebe tinan ne'e lidera simeira Komunidade Nasaun lian Portugues (CPLP) hodi hamorin Timor-Leste iha Mundu Internasional. 

Primeiru Ministru no Prezidenti republika mak nomeia Lu-Olo atu lidera CPLP durante tinan rua (2) ne'ebe hahu husi tinan 2014 to'o 2015. Amu Bispo Dioseze Baucau, Don Basilio do Nascimento hateten, esperansa boot no hein katak ulun boot nasaun ne'e, liliu Francisco Guterres 'Lu-Olo' sei hamorin Timor-Leste iha mundu internasional. 

"Agora ita nia boot sira hatene ita tenke hala'o servisu ne'e importante tebes ita boot sira pelumenus hamorin netik keta halo ita moe," dehan nia iha edifisiu Ministeriu negosiu estranjeiru, Praia Kokeirus, Tersa (5/2). 

Tuir Amu Bispu, TL kuandu tama no lidera organizasaun atu hakarak ka lakohi buat ne'e iha rotativa signifika loron ida Timor-Leste sei kaer ka lidera, tanba ne'e importante liu ne'e lideransa CPLP sira hamorin Timor-Leste nia naran iha CPLP inklui iha mundu internasional. 

Antes ne'e, Primeiru Ministru Kay Rala Xanana Gusmao, eis Primeiru Ministru Mari Alkatiri no Prezidenti Republika Taur Matan Ruak diskute kona ba Timor-Leste sei lidera CPLP tinan ne'e, iha palasiu Prezidensial Ai-Tarak laran, iha fulan kotuk. 

"Ami mos koalia kona ba prepara ba simeria CPLP, preparsaun ne'ebe ita hotu rona ona ami hili (Francisco Guterres 'Lu-Olo') atu orienta ita nia ekipa," dehan PM Xanana. 

 Tuir nia, durante enkontru informa mos kona-ba karta ne'ebe Governu dirije ona ba nasaun CPLP atu haruka sira nia reprejetante atu hela iha Timor-Leste hamutuk ho ekipa ne'ebe Governu Timor-Leste forma. 

"CPLP ne'ebe sei lidera husi 'Lu-Olo' atu deskute ona politika ne'ebe atu hala'o no aprezenta iha Simeria CPLP nian," dehan Xanana. Nune'e, Prezidenti Partidu FRETILIN Francisco Guterres 'Lu-Olo' katak, Governu liu husi Primeiru Ministru fo konfiansa ida ne'e la'os Primeiru Ministru de'it, maibe estadu tomak sei hala'o liu husi dekretu lei prezidensial ninian. 

"Sei iha dekretu lei ne'ebe liu husi prezidensia Republika atu bele fo poder ida ne'e ba hau no mos governu sei dekretu lei ida atu aprova ba iha komisaun ida ne'ebe hau sei prezide mak komisaun ba CPLP ninian," dehan nia.

.