"Eis Deputadu Sira La Selu Kareta Lelaun"

,

Jornal Independente Tersa-feira, 25 Fevereiru 2014 

Parlamentu Nasional (PN) ameasa atu koa orsamentu pensaun vitalisia ba eis deputadu balun ne'ebe lelaun kareta PN nian maibe seidauk selu to'o agora. Prezidenti parlamentu nasional (PN), Vicente Guterres hatete, Parlamentu nasional identifika ona eis deputadu na'in haat (4) mak seidauk selu kareta lelaun ne'e. 

Kareta lelaun ne'e akontese hafoin troka membru legislativu tuan ba foun iha tinan 2012, tuir proseduramentu katak deputadu antigu no deputadu sira ne'ebe kontinua tuur iha PN husu lelaun kareta ho kustu kada kareta U$9000 dolar Amerikanu, sira selu kada fulan maibe realdiade eis deputadu sira balun seidauk fo osan, pior liu tan mak, maski kareta ne'e sei estadu nian tanba seiduak selu hotu maibe sira troka ona matrikula. 

"Relativamente kareta parlamentu nasional iha problema barak tanba ita nia kolegas (eis deputadu) sira ne'ebe lelaun kareta PN arese nain haat seidauk selu," dehan nia iha plenaria iha uma fukun PN, horseik. Maibe prezidenti parlamentu nasional la koalia sai identidade klaru husi eis deputadu nain haat (4) ne'ebe seidauk selu, tanba ne'e, tuir nia, foin dadauk ne'e iha konselu administrasuan PN koalia ona ho Sekretariu jeral PN bele kontaktu fila fali ba eis deputadu ne'ebe seidauk selu kareta lelaun atu hatama osan ba Konselu Administrasaun PN. 

"Konsellu Administrativu PN husu sekretariu Jeral atu kontaktu para fo lembra ita nia eis deputadu sira katak, tenke selu osan ne'ebe kareta nian ne'e," dehan nia. Prezidenti PN dehan, se eis deputadu sira ne'e nia resposta laiha atu selu osan lelaun kareta ne'e, PN liu husi sekretariu jeral PN sein koa osan pensaun vitalisia ba deputadu ne'ebe la selu kareta lelaun ne'e. 

.