"Deskonfia ONU, Horta Hetan Pasa Revista Iha Guine Bisau"

.

Jornal Independente - Kuarta-feira, 05 Fevereiru 2014 

Reprejetante Sekretariu jeral Organizasaun Nasoens Unidas (ONU) Guine Bissau Dr. Jose Ramos Horta hetan pasa revista husi politiku balun iha nasaun frazil ne'e. 

Asaun pasa revista ne'e akontese iha loron 3 fulan-Janeiru (fulan kotuk), tanba deskonfia ONU la independente halo intervensaun ba prosesu eleisaun hodi apoia kandidatura partidu politiku balun. Sekretariu Estadu Desentralizasaun Administrasaun, Tomas Cabral hateten, Guine Bissau halo Check point (pasa revista) ba reprezetante ONU iha Guine Bissau ne'e mosu ho situasaun Politiku. 

"Ita iha ONU iha Guine Bisau, Ramos Horta ho nia misaun ne'e atu kria paz ho estabilidade," dehan nia hafoin informa relatoriu ba PN, iha uma fukun Parlamentu nasional horseik. Sekretariu estadu konsidera asaun ne'e akontese tanba intermus politika iha Guine Bissau. 

 "Sira (Guine Bissau) deskonfia nasaun unidus suporta kandidatu balun maibe prezensa Ramos Horta iha ne'eba atu tenta kria estabilidade no halo nafatin kontaktu ho partidu Politiku sira tanba ne'e, nia papel," nia informa. Maski nune'e, reprezetante TL ba prosesu resensiamentu Eleitoral la esplika klaru fatin partidu politiku Giine Bissau balun halo pasa revista. 

"Ita nia misaun iha ne'eba hela, ne'ebe ita tenke separa ita nia misaun no nasaun unidas nian iha Guine Bisau," dehan nia. 

Hafoin akontesementu ne'e, Horta kontaktu kedas ba Prezidente Guine Bissau, nune'e Prezidenti ne'e rasik husu ona deskulpa ba reprejetante ONU ne'e. 

Aliende ne'e, Sekretariu Estadu Desentralizasaun Administrativa (SEDA), Tomas Cabral informa mos kona ba preparasaun ba eleisuan Guine Bissau nian. Husi apoiu Timor-Leste hodi halo prosesu resensiamentu eleitoral konsege rezistu populasaun Guine Bisau hamutuk rihun 664 resin. 

 Tomas dehan, foin dahuluk TL halo prosesu resensiamentu eleitoral iha nasaun ne'e, ne'ebe ukun an ona durante tinan 41. 

 "Ita seiduak iha estimative katak sira nia eleitor hira, tanba informasaun ne'ebe ami hetan katak populasaun iha um (1) milaun e quinentus (500) ka (milaun 1,500) mas rihun 600 ita la hatene maibe hau hanoin prazu tempu ne'ebe hasai ba fulan rua bele ona asegura resensiamentu eleitoral," dehan nia iha uma fukun PN. 

Tuir nia, iha nasaun Guine Bissau iha partidu politiku hamutuk 48 no partidu politiku boot liu mak PEJC mak seiduak hatama lista kandidatura ba iha prosesu kandidatura resensiamentu eleitoral. 

 "Ne'e mak sei iha hela prosesu negosiasaun ho Ramos Horta no Mari Alkatiri sei ba iha dia (17/02) to'o (21/02) hodi koalia no halo negosiasaun par abele hatama lista kandidatura ba prosesu lista kandidatura ne'e," nia informa.

 Razaun partidu PEJC la hatama lista kandidatura, nia dehan, prezidenti partidu PEJC iha rai liur ne'ebe difikulta kongresu ba partidu politiku, tanba ne'e, eis Primeiru Ministru Mari Alkatiri ba ho objetivu atu halo negosiasaun hodi hetan konsensu atu sira oinsa bele halo reorganiza sira nia lista kandidatura tanba eleisaun sei hala'o iha 17 fulan-Marsu 2014 tuir kalendariu no dikretu prezidensial. 

Kona ba seguransa Tomas akresenta, seguransa ba reprezetante TL iha Guine Bisau la'o kapaas no normal tanba nasaun Guine Bissau ho Governu Timor-Leste iha kolaborasaun diak. 

"Sira mak haruka ita ba, ne'e sira nia responsablidade atu asegura seguransa no durante ne'e ita nia relasaun diak tebes iha Guine Bissau, liliu parte seguransa no prosesu resenseamentu la'o nafatin," dehan nia.

,