"Comite 12 Novembru Kontra Octavio Lori AJREPT Defende FFTL"

.

Jornal Nacional Diario - Kuarta-feira, 26 Fevereiru 2014 

Organizasaun Comite 12 Novembru, ne'ebe lidera husi Grogorio Saldanha kontra maka'as deklarasaun Kolega Octavio sa Conseicao Anos lori ema Alianca Juventude Rezistensia no Eis Prijioneirus Politika Timorense (AJREPT) nia naran hodi ba defende fali estrutura actual Federasaun Futebol Timor-Leste (FFTL). 

"Comite 12 Novembru la konkorda kolega Anos laiha kompetensia atu reprezenta ema rezistensia no dadur tomak, tanba ami seidauk foti kolega anos hanesan ami nia reprezetante ka protavoz hodi koalia defende fallansus ne'ebe mak komete husi lideransa estrutura FFTL actual tuir ita nia sosiedade nia persepsaun," deklara Prezidenti Comite 12 Novembru Gregorio Saldanha liu husi konferensia ba imprensa Tersa (25/2), iha Balide, Dili. 

Comite 12 Novembru konsiente katak, ema rezistensia sira iha dignidade boot noa iha valor heroismu a'as no hetan rekonesementu husi Estadu Timor-Leste, entaun labele utiliza naran ne'e arbiru ba ema balun nia interese. 

"Uluk sira luta hodi defende buat boot, mak povu ho rai Timor-Leste hetan libertasaun, nune'e sira nia dignidade no heroismu ne'e labele utiliza hodi defende fali ema ida ka rua ne'ebe halo fallansu ruma, tuir sosieade nia haree," hateten Grigorio. 

Grigorio informa mos katak, Comite 12 Novembru kondena maka'as hahalok dirijentes FFTL nian ne'ebe gosta aproveita no utiliza ema rezistensia ho dadur sira hanesan eskudu (tameng) hodi defende sira, wainhira sira enfrenta porblema sira ne'ebe oras ne'e dadaun ema barak kestiaona. 

Comite 12 Novembru mos apoiu totalmente inisiativa Grupo AMANTE Hadomi Futebol ne'ebe servisu ho laran mos hanesan Timor oan hodi kuriji failansu, nune'e bele dezenvolve Timor-Leste inklusivamente iha modalidade futebol. 

Grigorio afirma katak, laos comite 12 Novembru mak iha kompetensia atu rezolve problema ne'e, maibe se mak iha kompetensia mak parte rua (AMANTE ho FFTL) tenki tur hamutuk no mestri ba resolve problema refere mak dialogu. Hatan ba lamentasaun husi Comite 12 Novembru nian, Portavos Aliansa Joventude Rezistencia no Eis Prizionerus Politika Timorense (AJREPT), Octavio da Conceicao Anos iha nia serviso fatin Bairo Formoza Dili hateten, sidadaun hotu-hotu iha direitu atu fo hanoin ba asaun ka aktus ruma ne'ebe prejudika ema seluk nia hanoin. 

"Hau hakarak hateten lolos konferensia ba imprensa ne'ebe halo iha semana kotuk ba, hau la lori Comite 12 Novembru nia naran ka ema ruma iha Comite 12 Novembru nia naran hodi reprezenta Juventude Rezistencia no eis prizioneirus, maibe 'em nome' hau rasik mos hanesan joventude rezistensia, eis prijioneirus iha tempu ne'eba, tanba ne'e hau senti katak akuzasuan husi grupu AMANTE ba FFTL laos deit ba maun Francisco Kalbuadi Lay maibe ba mos hau nia kompaineiru Aleixo Cobra hanesan Vice Prezidneti FFTL, Amandio, Osorio no seluk tan ne'ebe hetan alegasaun husi grupu AMANTE, ne'e prejudika hau hanesan ema maluk rezistencia ida, hanoin hodi fo apoiu moral ba sira," hateten anos. 

Nia mos hatutan katak," Comite 12 Novembru laiha autoridade ida atu hateten katak, sira hili hau atu reprezenta Comite 12 Novembru, hau hateten katak, hau la reprezenta komite 12 de Novembru maibe hau reprejenta aliansa Joventude rezistencia no eis prijioneiru Politika Timor-leste ne'ebe hamaon aan iha AJREPT," dehan nia. 

Iha Oportunidade ne'e mos Vice Prezidenti FFTL, Aleixo da Silva Gama Alias Cobra hateten, sira nia konferensia ba imprensa semana kotuk ne'e la bolu ema ida, maibe organizasaun hotu-hotu fo solidaridade tanba ema ne'ebe sira akuza mak lideransa FFTL actual. 

 "Ami nunka fo konvite ba ema ida, ne'e Gregorio 'salah alamat' dehan ami konvida ema tanba antes atu halo konferensia ba imprensa ne'e kalan ami enkontru husu ba sira bele dehan halo iha FFTL ka lae? 

Maibe maluk sira dehan tenke halo iha ne'e tanba imi servisu iha FFTL ne'e," hateten Aleixo Cobra. Nia hatutan, AJREPT, sei hamrik nafatin atu defende dignidade ema rezistensia nian iha nasaun ida ne'e no Anos sai protavoz no matadalan ba maluk AJREPT nian.

,