Alkatiri, Xanana, Lu-Olo no Taur "Sei Sai Formador Ba Jestor Deskonsentrasaun"

.

Jornal Nacional Diario - Kuarta-feira, 26 Fevereiru 2014 

Sekretariu Estadu Fortalesementu Institusional (SEFI) Francisco Soares "Borlaco" informa katak, jestor sira ne'ebe atu kaer ukun iha planu deskonsentrasaun ne'e, sei hetan formasaun husi nain ulun no matenek nain sira iha Timor-leste (TL), hanesan Prezidenti Republika Taur Matan Ruak, Primeiru Ministru Kay Rala Xanana Gusmao, Prezidenti partidu Historiku FRETILIN Francisco Guterres 'Lu-Olo', no Selretariu Jeral FRETILIN Mari Bim Amude Alkatiri. 

Tuir Francisco Borlaco katak, atu lao ba oin ne'e, Governu iha ona planu estratejia dezenvolvimentu nasional, vizaun 2030, tanba ne'e nu'udar ukun nain tenki hatene ida ne'e, oinsa mak atu hatene dezenvolvimentu. 

"Formador sira ne'e, PM Xanana rasik mos sei sai formador ida, ita nia Prezidenti Republika Taur Matan Ruak, Maun Mari Alkatiri, Maun Lu-Olo, no ita nia matenek nain sira hanesan, Sr. Deonisio Babo, Sr. Bendito Freitas, Francisco Guterres, Julio Thomas Pinto, Antonio Conceicao ho tan sira seluk," informa Francisco soares 'Borlaco' ba jornalsita sira iha konferensia imprensa ne'ebe hala'o iha Palacio Governu Tersa (25/2). 

Tanba ne'e presiza fo partisipasaun ba jestores ne'e, atu sir abele promove politika ida ne'ebe bele dehan katak, uza paradigma foun ba formasaun ida ne'e. 

"Ukun nain ba deskonsentrasaun ne'e mos, tenki hatene jestaun, nia tenki hatene planeamentu, orsamentu, ezekusaun, monitorizasaun, no halo relatoriu, e ne'e mos bele sai hanesan fontes tomak ka sentru boot ida, para nia bele jere Distritu sira ne'e la'o ho diak," relata Borlaco. 

Tanba ne'e, Borlaco dehan, iha loron 27 fevereiru agora, governu liu husi Sekretariu Estadu Fortalesementu Institusional (SEFI), sei halo Workshop nasional ida iha centro Convesoens Dili, (CCD). Objetivu husi Workshop ida ne'e, atu koalia kona ba oinsa mak publiku no ukun nain sira tomak, eis membru governu tomak no eis membru parlamentu tomak, i sosiedade sivil sira hotu, atu hanoin hikas no fo mos opiniaun balun kona ba oinsa mak atu bele hahu prosesu deskonsentrasaun iha Distritu 13. Borlaco hatutan tan, iha programa deskonsentrasaun ida ne'e, publiku mos hatene katak, Primeiru Ministru rasik mos halo ona konsultasuan ba programa ida ne'e, ba distritu 13, hodi rona mos povu nia hanoin kona-ba planu ida ne'e. 

"Atu ita hatene katak, rai ne'e husi ne'ebe mak mai, mai hori bainhira, oinsa mak mai, i agora ita to'o ne'ebe ona, mas ita atu hatene, ita agora iha konstituisaun do estadu, ita nia situasaun tomak mak ida ne'e katak, instituisaun tenki forte, sistema tenki diak, I oinsa mak ita atu lao ba oin," relata Borlaco. 

.