Uja Kilat Ameasa Komunidade "Eskoltu PM Xanana Viola Lei"

.

Jornal Nacional Diario - Sesta-feira, 31 Janeiru 2014 

Komandante polisia Unidade Especial Polisia (UEP), Superintendente Xefi, Afonso dos santos hateten, Boby Goncalves nuudar eskoltu Primeiru Ministru (PM) Kay Rala Xanana Gusmao, lori kilat ameasa tiru hasoru komunidade ne'e viola lei ne'ebe mak vigor. 

Kazu ne'e akontese iha sabadu (25/01) foin lalais ne'e iha nia uma iha area Fomento Comoro, Dili liu husi festa ida iha fatin ne'eba, ba kazu ne'e rasik oras ne'e daudaun Boby detein hela iha Kuartel polisia Unidade Espesial. 

"Hanesan wainhira membrus ida mak uja kilat for a de area servisu ida ne'e mos viola ona, tanba kilat ne'e povu nian uja atu halo guarda ba povu no estadu ida ne'e, laos para atu tiru tun sa'e, hanesan informasaun iha prosesu nia laran bainhira nia tiru kilat ne'e mos nia tiru iha ninia fen nia uma, mas ida ne'e tuir lolos labele, lei la autoriza tanba fora tiha ona husi area servisu ninian, hanesan for a de servisu labele lori kilat, bele lori para hodi halo eskoltu maibe labele halo atuasaun arbiru deit ka tuir hakarak rasik," Komandante Polisia UEP, Superintendente xefi Afonso dos santos afirma asuntu ne'e ba jornalista sira iha Kuartel jeral UEP, Bairo-Pite, Dili, Kinta (30/1). 

Nia dehan, komesa horibainrua Tersa (28/01) to'o agora Boby sei detein hela iha Kuartel UEP, komandu unidade fo tempu ba nia hodi bah an hafoin ne'e fila fali ba iha kuartel UEP, tantu ba kazu refere oras ne'e dadaun nia prosesu tama ona ba iha departementu seksaun Justisa UEP ninian hodi prosesa. 

Nune'e mos komandante Polisia Departementu Justisa, Superitendente Xefi Carlos Geronimo afirma katak, Unidade Especial Polisia (UEP) liu husi sub unidade Corpu Seguransa Pessoal (CSP) foti inisiativa hodi fo suspensaun ba Boby Goncalves, tanba utiliza ka uza armas hodi tiru ameasa komunidade. 

Nia hatutan, eleinde hasai Boby husi eskoltu PM, UEP mos hasai hotu armamentu ne'ebe mak Boby lori hodi halao knar loro-loron, asaun ne'ebe mak unidade halo, ne'e hanesan prevensaun ida atu la bele akontese tan. 

"Ita hotu hatene ne'e laos hasai nia husi Polisia maibe dada nia ba iha Unidade Espesial par abele halo prosesu investigasaun ba nia," haktuir nia. Ba kazu ne'e rasik JN-Diario konfirma asuntu refere ba Boby liu husi via telefone hodi bele klarifika asuntu ne'e, maibe Boby rasik rezeita atu fo komentariu.

.