“Tinan Foun Ho Vida Foun”

.

Jornal Nacional Diario - Segunda-feira, 06 Janeiru 2013 

Tinan foun nee Nai Maromak hakarak ema hotu tenki vida foun, halo foun familia nia vida, no vida foun ba sosiedade tomak, tamba ne’e tenke soe hahalok at no pekadu nebe durante ne’e hamutuk hela iha ema ida-idak nia a’an. 

 Amo Bispo Diocese Dili, Dom Alberto Ricardo da Silva hato’o lia hirak ne’e iha ninia homilia iha Misa Tersa (31/12) kalan iha Igreija Katedral Dili. Bispo Diocese Dili ne’e dehan tan moris foun ba tinan 2014, hanesan santo foun ba ema hotu-hotu nia vida moris, ne’ebe tenki la’o hamutuk ho paz ne’ebe mak mai husi nai Maromak. 

 “Maluk doben sarani sira, misa ohin kalan, ita atu husu gracas lalehan ba ita nia moris, ne’eduni moris foun no moris santu ne’e tenki la’o duni ho paz, paz ne’ebe mai husi nai maromak tanba maromak rasik lao ho justica no maromak mak domin nia nain,” haklaken amo Bispo Dioseze Dili, Dom Alberto Ricardo. 

Dom Alberto hatutan, misa (31/12) kalan hatudu katak, tinan tuan 2013 ohin kalan, no tinan foun 2014 loke dadaun odamatan atu tama mai, asae agradese barak ba aman maromak tanba buat diak hetan no simu iha tinan 2013 nia laran.

 “Ita nia saude, Vida, familia, han hemu, relasaun ho nai maromak no gracas sira seluk ne’ebe ita simu iha orasaun, misa atu halo santu ita, ho buat sira ne’e hotu ita tenki hasae agradese ba nai maromak,” Bispo hateten. 

Tuir observasaun Jornalista JNDiario iha misa kalan ne’e, sarani rihun ba rihun partisipa iha misa refere, maske misa lao hela maibe labarik sira sunu paison tarutu tun sae iha igreija hodi halo sarani sira balun laiha konsentrasaun ba misa.

.