Taca Timor Cup Governu Aloka Osan U$ 80.000, ”Ekipa Fotebal Konsidera Governu Promete Falsu Ba Futebolista”

.

Foto de, Marcos Guterres Gusmão

Notisia Husi TVTL - Kuarta-Kalan, 08 Janeiru 2014 

Ekipa Futebol Timor-Leste B sai primeiru lugar ba Taca Timor Cup hafoin manan ekipa konjunta PNTL no F-FDTL 3-0, maibe eventu ne’e remata ho laran triste ba jogador sira tamba komisaun organizadora fo sai premiu la tuir rejultadu ne’ebe fo sai iha teknikal meetin.

Jogus final ba Taca Timor Cup ekipa fotebol Timor-Leste B manan ekipa konjunta PNTL no F-FDTL 3-0, jogus ne’ebe asiste husi adetus rihun ba rihun iha stadion Municipal Dili ne’e, ekipa rua ne’e hatudu kontra ataka ho taktiku ne’ebe diak hodi fo haksolok ba adetu sira nia laran no fo aplas ba jogu ida ne’e, maibe hamosu trsiteza boot ida ba jogador sira tamba komisaun organizadora hato’o premiu ne’ebe ba jogador sira la tuir orsamentu ne’ebe promete ona.

“Jogu ida ohin hau senti kapaas tebes, maibe ami senti la satisfas ho premiu ne’ebe mak hato’o husi komisaun organizadora (Sekretariu Estadu Joventude Desporu), tamba sira promete mai ami no la’os mai ami de’it maibe promete ba publiku katak, primeiru lugar hetan U$ 20.000 (Vinte Mill Dollar Amerikanu), segundu lugar hetan U$ 15.000, maibe ohin sira fo sai dehan, primeiru lugar hetan U$ 4000 de’it, ida ne’e ami sentu hatun jogador sira (Bosok jogador), ne’e la dun diak,” dehan Jogador husi ekipa B.

Maske nune’e, komunidade Timoroan ne’ebe hela iha Darwain partisipa iha eventu ida ne’e senti orgulu tamba eventu ida ne’e diak hodi bele halibur Timoroan sira.

“Ami komunidade Timoroan ne’ebe hela iha Darwin senti kontenti tamba ne’e hanesan festa ida hodi halibur Timoroan husi liur no mos rai laran rasik, labarik sira ne’ebe mak nunka mai Timor sira mos kontenti no balun partisipa tan joga, mai mos hare sira nia rain, joga ne’e kapas tebes maibe rejultadu mak la dun dia, ami triste tamba ami mai husi dook atu asiste buat diak maibe akontese fali oin seluk, tamba loke eventu ne’e ho diak maibe taka sala oituan, ami la kestiaona premiu ne’e maibe ami kestiaona buat ruma iha kotuk la los” dehan Komunidade husi Australia.

Hatan ba problema ne’ebe akontese, Sekretariu do Estadu Joventude Desportu, Miguel Manitelo esplika.

“Komisaun sala tamba sira promete, mais ohin hau bolu komisaun, komisaun esplika bah au katak, sira prmete param iha promete barak husi kompania sira ne’ebe atu fo apoiu mas to’o ikus ema ne’ebe fo apoiu ne’e mak la fo, maske sira nia logo (lambang) taka tiha iha kampo laran, ne’ebe total apoiu osan kuaze U$ 80.000 ital, ba despezas hau seidauk hare mai husi relatoriu, balansu ikus liu hela U$ 11.000, U$ 11.000 ne’e mak hanesan premiu, ba primeiru lugar U$ 4500, U$ 3500 ba segundu lugar, terseiru lugar U$ 2500. Aban (ohiin, 08/1) hasoru malu iha SEJD, komisaun ho ofisias sira atu koalia ba malu e hau iha neeba atu haree solusaun ne’e halo nusa, loloos ne’e simu lai premiu ne’eba ho taca sira ne’eba, aban it bele rejolve kona ba osan ne’e, maibe vom Timoroan sempre hanesan ne’e, hau lolos hateten buat ne’e buat kiik tamba se ita koalia ba malu hau hare iha dalan para bele rejolve, maibe vom espirito desportu nia mak la dun iha ona, hau hakarak reuniaun ne’e aban solusaun saida, hanesan membru governu ne’ebe tutela ba desportu e Kopa Timor ne’e lolos organiza husi Governu e hau espera tenki iha solusaun, tamba vom ohin sira koalia kona ba sira nia dignidade, ami atu ba esplika halo nusa, kestaun lideransa ne’e iha ne’eba, iha situasaun difisil lider ida labele konvense ona ema seluk, ho laos lider ona,” dehan Manitelo. Oras ne’e dadaun problema ne’e rejolve ona iha SEJD hodi buka solusaun entre komisaun organijadora, Ofisiais klubu no SEJD Miguel Manitelo.

.