“Setembru 2014, PM Xanana Rezigna-an”

.

Jornal Nacional Diario - Tersa-feira, 07 Janeiru 2013 

Maske antes ne’e, Primeiru Ministru (PM) Kay Rala Xanana Gusmao deklara abertamente ba publiku katak, nia sei rezigna-an iha tinan 2015, maibe fonte konfirmadu husi Gabinete V Governu Konstitusional hateten katak, PM Xanana Gusmao sei rezigna-an iha fulan Setembru 2014. 

Primeiru Ministru Xanana Gusmao rezigna an ne’e tanba hakarak atu fo tempu ba jerasaun foun atu kaer ukun, alende ne’e, jerasaun tuan sira mos iha ona servisu seluk ne’ebe mak sira tenki fahe ba malu hodi hala’o. 

PM rasik wainhira sai husi Governu, nia sei lidera planu Dezenvolvimentu Integradu, Mari Alkatiri sei lidera Zona Ekonomiku Eskluzivu, Framcisco Guterres Lu-Olo sei lidera Desentralizasaun Administrativu no Munisipiu, no Ramos Horta wainhira nia mandatu remata iha Guine Bissau iha Jullu 2014, sei hetan mos kargu foun iha TL. 

Rezignasaun PM Xanana Gusmao ne’e, parte husi remodelasaun Governu ne’ebe mak PM rasik promete tiha ona,” informa fonte konfirmadu ne’e ba JNDiario, Segunda (06/1) ne’e, iha Dili. 

 Fonte informasaun ne’e mos akresenta katak, iha rezignasaun PM Xanana Gusmao ne’e, iha membru V (kintu) Governu konstitusional 70% mak sei katik sai, kala tama fila fali iha governasaun foun ne’ebe harii husi Primeiru ministru foun. 

 Fonte informasaun ne’e hatutan tan katak, iha figura potensial na’in hat (4) mak kandidatu forte atu troka Primeiru Ministru, kandidatu sira ne’e nain tolu (3) iha Governu no nain ida (1) iha liur ka la tama Governu katual. 

“Depois hili tiha PM foun mak, PM foun ne’e sei forma fali ninia Governu foun,” fonte konfirmadu ne’e esplika. 

Nune’e mos fonte informasaun ne’e dehan tan, PM ne’ebe mak atu troka PM Xanana ne’e, tenke priense criteria sira mak hanesan, ema hotu tenki simu, tenki hatene situasaun povu nia moris, tenki konese situasaun Timor.

.