"Selesaun Dokumentu Ba F-FDTL Foun Halo Husi Ekipa Portugal"

.

Jornal Independente - Sesta-feira, 31 Janeiru 2014 

 Kandidatu FALINTIL-Forca Defeza Timor-Leste (F-FDTL), ne'ebe foin lalais hatama ona dokumentu atu sai military, sei hetan selesaun husi ekipa rekrutamentu husi Portugal. 

Ekipa Portugal ne'ebe tama iha faze selesaun ne'e iha oin rua, ekipa ida atende ba selesaun dokumentu no ida seluk atende ba teste mediku. Diretor Jeral, Sekretariu Estadu Defeza (SED), Joao Cortereal hateten, planu komisaun organizadora nian iha semana ne'e nia laran ekipa husi nasional ba rekolla ona dokumentu sira ne'e. 

"Ami konvida ekipa husi Portugal ne'e tanba atu evita KKN (Korrupsaun, Koluzaun no Nepotizmu)," dehan nia, iha Kuartel Jeral F-FDTL, Fatuhada, Dili, horseik. Nia hatutan, prosesu selesaun dokumentu ne'e sei hahu husi 10 fevereiru to'o 15 Marsu, ekipa Timor oan rasik bele halo selesaun ba dokumentu, maibe tanba deit evita KKN mak tenke bolu ekipa husi Portugal ne'e. 

Iha duni fungsionariu SED nian balun, maibe atu ajuda deit prosesu tomak iha ekipa Portugal nia liman. Depois selesaun tiha sei anunsia naran kandidatu hira ne'ebe liu iha media, nune'e mos Administrasaun sub-Distritu sira no Komandu Polisia nasional Timor Leste (PNTL), iha faze tuir mai sei teste fila fali hanesan teste fiziku, teste mediku no teste psikotest. Iha tinan hirak liu ba laiha teste fiziku maibe iha tinan ne'e aplika mos teste fiziku, rezultadu husi teste ne'e mak foin deside loos se-se mak liu. 

Total formulariu ne'ebe mak distribui hamutuk 22.100, formulariu hirak ne'e fahe ba Distritu, nune'e mos sub-Distritu, kada suku hetan formulariu 50. Teste mediku sei hala'o iha Hospital Nasional Guido Valadares (HNGV), mediku mai husi Portugal no apoiu mos mediku Timoroan, rekrutamentu F-FDTL tinan 2014 ne'e hamutuk 500 ba vaga prasa. 

Antes ne'e, Sekretariu Estadu Defeza, Julio Thomas Pinto hateten, prosesu rekrutamentu ne'e ninia kriteriu rigorozu tebes tanba atu sai forsa ida ne'ebe diak tenke prienxe criteria hirak neebe fo sai ona husi komisaun. 

.