“PM Xanana Garante 2014 Loke Kampo Servisu”

.

Jornal Nacional Diario - Segunda-feira, 06 Janeiru 2013 

Primeiru Ministru Kay Rala Xanana Gusmao iha loron 31 Dezembru kalan molok husik tinan tuan 2013 hodi simu tinan foun 2014 iha Palacio Governu oin promete sei loke kampo servisu ba joven sira. 

Xefi Governu hato’o lia hirak ne’e iha serimonia natal hamutuk entre governu ho labarik sira, nune’e mos nuudar serimonia hodi husik tinan tuan 2013 no simu tinan foun 2014 nebe governu mak organiza. 

Atu loke oportunidade servisu ba joven sira ne’e la’os deit atu hotu-hotu sai funsionariu publiku maibe governu sei buka meus oinsa kria kondisaun ba seitor privadu nasional no internasional hodi halo investimentu iha rai laran. 

Lider karismatiku nee mos dehan Timor Leste iha ninia demokrasia rasik, laos ema seluk mai hanorin demokrasia mai ita Timor oan, Timor Leste nia demokrasia la hanesan demokrasia iha Eropa. 

Eis Prezidenti organizasaun sumrina Congresu Nacional Rezistensia Timorense (CNRT) iha tempo rezistensia no actual Prezidente Partidu Congresu Nacional Rekonstruksaun Timor (CNRT) ne’e fo hanoin ba povu Timor tomak atu matan moris neon moris nafatin tanba ema balu mai hakarak estraga nasaun ida ne’e. 

Eis komandante em Xefi FALINTIL nebe komandante funu Timor Leste nian ne’e mos fo hanoin fali ba povu katak, tinan oin 2015 sei husik duni kintu Governu Konstitusional hodi fo jerasaun foun sira atu kontinua prosesu ne’e lao ba oin. 

 Iha natal hamutuk ne’e Governu fahe mos prezente ba labrik sira, prezentes ba prezepiu nebe hetan premeriu klasifikasaun, segundu klasifikasaun no terseiru klasifikasaun iha 2013, nunee mos prezentes natal nian ba reprezentante husi Distritu 12. 

Serimonia husik tinan tuan 2013 no simu tinan foun 2014 ne’ebe hala’o iha palacio Governu oin ne’e hetan partisipasaun maximu husi populasaun iha kapital Dili no mos balun mai husi Distritus, tamba hakarak akompania troka tinan tuan no foun ne’e. 

Wainhira atu kalan fahe ba rua, oras zero zero governu tiru paison iha Placio Governu nudar sinal husik tinan tuan 2013 ho 2014, nune’e mos paixon kuaze tarutu iha fatin-fatin, halo sidade Dili sai hanesan funu boot no mos naroman paison ninia lakan. 

.