“Nasaun Balun Lakohi TL Iha Forsa Armada”

.

Jornal Independente - Tersa-feira, 14 Janeiru 2013 

 Major jeneral FALINTIL-Forsa Defeza Timor-Leste (F-FDTL), Lere Anan Timur konfesa katak, inisiu harii forsa armada iha Timor-Leste (TL), nasaun balun mak lakohi atu nasuan ne’e iha forsa armada rasik, hakarak polisia deit mak eziste. 

Maibe, tuir nia, kuandu nasaun ida mak laiha forsa armada ne’e la fo sentidu ba nasaun soberanu ida hanesna TL ne’ebe Independente ona. 

“Hau rasik mak kmanda ekipa ida atu harii forsa armada ne’ebe halo dialogu iha momentu ne’eba ho Jeneral smith, Komandante PKF ninian, hau husu ba nia tamba saida mak nasaun sira seluk hanesan, Indnesia, Australia iha Forsa armada TL labela iha,” dehan Lere liu husi nia deskursu iha Aniversariu komponente Naval iha Hera Domingu (12/01). 

 Maijor jeneral hatutan, TL mos nasaun ida ne’ebe independenti ona, entaun sira (PKF) haruka ekipa ida naran ekipa kiskeru mai husi Inglatera nian mai halo estudu analiza TL iha nesesidade ka lae hodi iha nia forsa rasik. 

 “Sira (ekipa Kiskeru) mai halo pergunta mai ami lahatene tuir ema matenek liu mak halo pergunta husu, inimigu nee mai husi nebe? Tanba saida mak iha forsa armada? Maibe ita konsege iha forsa armada,” dehan Lere. 

Nia dehan, maske nune’e iha momentu ne’eba la temi atu harii komponente hotu, komu eis xefe Estadu maior, jeneral Taur Matan Ruak trasa planu bazeia ba planu forsa armada 20:20 nian hodi alkansa to’o agora hodi transforma forsa gerilleiru mai F-FDTL hodi harii tan komponente lubuk ida ona iha F-FDTL nia laran. Iha okaziaun ne’e, Lere la esplika klaru razaun saida mak nasaun sira seluk ne’ebe hola parte iha PKF nia laran lakohi Timor-Leste atu iha nia forsa armada rasik.

.