"Lu-Olo Prontu Lidera Simeira CPLP"

.

Jornal Nacional Diario - Sesta-feira, 31 Janeiru 2014 

Lider Opozisaun FRETILIN, Francisco Guterres 'Lu-Olo' prontu lidera simeira Comunidade paises Lingua Portugues (CPLP) ou Komunidade nasaun Koalia Lian Portugues (KNKLP), iha fulan jullu iha Dili, tanba ida ne'e konfiansa ne'ebe Estadu fo atu kontribui ba TL. 

Lu-Olo hatutan katak, konfiansa ne'e la'os deit husi Primeiru Ministru (PM) mesak maibe estadu tomak nian, tanba ne'e Prezidenti Republika sei halo dekretu lei atu bele fo kompetensia ba nia atu lidera komisaun para prezidi Komisaun CPLP. 

"Ne'e kontribuisaun ida ne'ebe hau hanesan sidadaun hau hakarak fo ba hau nia rai no bah au nia povu ida ne'e, tanba ne'e mak hau aseita, la'os hau aseita ba servisu hau nia partidu ka ba partidu sira seluk ne'ebe mak iha Governu, maibe hau servisu ba iha estadu ninia ne'ebe hau hakarak atu kontribui ba buat oituan ne'ebe mak hau iha atu fob a ita nia estadu," hateten Lu-Olo ba Jornalista sira iha Hotel Timor (HT) Dili, Kinta (30/01). 

Aktual Prezidenti Partidu FRETILIN ne'e akresenta katak, ninia preparasaun ne'e tenki iha baze legal nune'e iha Kinta (29/01) sira enkontru ona ho Primeiru Ministru (PM) ne'ebe iha ona orden servisu no atividade ne'ebe mak sei hala'o, maibe sira sei fo sai iha programa tempo oin mai hodi halo saida iha fulan fevereiru, Marsu, Abril, maiu to'o Junu. 

"Ami sei hein baze legal hodi bele fo poder ida mai hau rasik atu forma komisaun, hafoin ida ne'e ami sei pronto hala'o atividade hodi prepara ba simeira CPLP nian iha Timor Leste, atividade ida ne'e hau sei haree to;o iha Fulan Setembru hanesan ne'e," eis Prezidenti Primeiru no segundu lejislatura nee fundamenta.

.