“Emilia Pires Hatudu Sinal Rezigna Asn”

.

Jornal Independente - Segunda-feira, 13 Janeiru 2013 

Ministra Finansas, Emilia Pires dezde audensia Orsamentu Jeral Estadu (OJE) 2014 iha Parlamentu Nasional (PN) la dun ativu, nune’e, iha debate jeneralidade OJE mos la marka prejensa, ne’e duni, hamosu ipoteza katak, Ministra Finansas, Emilia Pires hakarak rezigna aan husi nia kargu. 

Prezidente Bankada Partidu Demokratiku (PD), Deputada Maria Lurdez Bessa katak, auzensia Ministra Financas nian iha debate OJE 2014 nian bee sai nu’udar sinal ida atu rezigna an, kuandu nia kondisaun saude la premite. 

“Bele mos (Ministra Financas Rejigna an( se nia kondisaun saude la premite, ita la hatene? Ne’ebe ita tenke akompania prosesu ho ulun malirin no espiritu prontidaun,” dehan nia iha uma fukun PN, sesta (9/01). 

Maski nune’e bancada PD rasik seidauk iha informasaun formal ruma kona-ba rezignasaun Ministra, Emilia husi nia kargu ministra Finansas. 

Entertantu, informasaun konaba rezigansaun membru Governu balun, Bloku Koligasaun (BK) rasik rona ona, maibe seidauk iha serteza se mak atu rezigna aan. Deputada Bessa dehan, issu kona ba rezignasaun membru governu PD mos rona ona, maibe ne’e normal akontese, importante mak fatin ne’ebe labele atu subtitui hanesan fatin ba Primeiru Ministru nian mak sai problema. 

“Iha ema (membru Governu) mak hakarak atu rezigna aan, sei iha ema seluk atu halo fali servisu ne’e,” nia hateten. 

Nune’e, PD rasik pronto atu subtitui kuandu iha duni membru governu balun rezigna an, tanba prinsipiu PD nian mak hateten ba nesesidade povu no estadu. Informasaun rezignasaun ne’e, Partidu CNRT rasik mos rona ona, membru Bancada CNRT, Aderito Hugo da Costa hateten, issue membru governu balun atu sai iha ona, maibe seidauk iha justifikasaun loloos, se mak atu rezigna aan. Maibe nia dehan, karik iha duni membru governu balun hakarak rezigna aan ne’e hatudu sinal pozitivu, tanba sidadaun timor ida hetan konfiansa atu kaer kargu ida, maibe depois senti labele konsentra liu ba servisu estadu nian husu atu sai. 

“Diak liu tan karik rezigna aan ne’e tanba rekonese nia inkapasidade, ne’e sinal diak ba kargu politiku hotu-hotu atu se mak laiha kapasidade ka laiha tempu atu fokus ba ninia kargu diak liu nia sai,” dehan nia. 

Atu antisipa situasaun ne’e, Partidu CNRT nuudar partidu vensidor iha nia pozisaun forte tebes intermus rekursu umanu,esperensia, kapasidade atu assume responsablidade, tanba CNRT lidera ona governu iha 2007. Entertantu, Sekretariu Jeral Partidu FRETILIN, Mari Alkatiri hateten, Partidu FRETILIN lakohi hatama nia kanoru tohar ba auzensia Ministra Finansas iha debate OJE, tanba jestaun Governu ida-idak nian, maibe kompara ho tempu Governasaun FRETILIN nian, Ministra Finansas loloos tenke partisipa iha debate OJE. 

“Tuir loloos Ministra Financas tenke partisipa iha debate OJE atu bele asesoria ba primeiru Ministru hodi hataan sasan sira ne’e,” dehan Mari.

.