"CNRT Mak Iha Direitu Hili PM Foun"

.

Jornal Nacional Diario - Sesta-feira, 31 Janeiru 2014 

Lider Opozisaun FRETILIN, Francisco Guterres Lu-Olo hateten katak, Partidu CNRT mak iha direitu atu hatudu Primeiru Ministru (PM) foun hodi troka Primeiru Ministru (PM) Kay Rala Xanana Gusmao, wainhira rezigna-an, tanba laiha posiblidade atu forma VI Governu, no kuandu forma VI Governu bele akontese eleisaun antisipada. 

Maibe kuandu iha eleisaun antisipada Lu-Olo mos dehan, presiza lori tempu naruk. Tanba ne'e, Lu-Olo prefere, partidu mais votadu iha bloku koligasaun bele hatudu ema ida hodi kontinua pasta PM para kaer metin estabilidade politika. 

"Laiha posiblidade atu forma VI Governu, tanba ne'e lori tempu naruk no ne'e bele akontese eleisaun antisipada, nune'e bloku koligasaun partidu mais votadu CNRT bele hatudu ema ida hodi bele kaer Pasta primeiru Ministru, hodi bele kaer metin nafatin estabilidade politika," hateten Lu-Olo ba jornalista sira, hafoin partisipa debate sobre pretendida Rezignasaun Primeiru Ministru (PM) Kay Rala Xanana Gusmao, iha Hotel Timor (HT) Dili Kinta (30/01). 

Lu-Olo akresenta katak, Dr. Mari Alkatiri ho Sr. Primeiru Ministru Kay Rala Xanana Gusmao sempre la'o hamutuk ne'e laos sira nain rua mak influensia ba malu hodi PM rezigna-an, maibe ne'e desizaun PM ninia rasik hodi husu no hakarak rezigna-an, tanba iha konstituisaun artigu 12 alina b ne'e preve katak, PM bele husu nia rezignasaun nune'e rezignasaun ida ne'e naturalmente sei iha subtituisaun. 

Eis Prezidenti Parlamentu Primeiru no Segundu lejislatura ne'e esplika katak, se partidu mais votadu CNRT labele hatudu ida ba PM, entaun Konsellu Estadu sei fo Konsellu ba Prezidenti Republika atu bele desidi ho lia fuan hikus ne'e oinsa. 

Tuir informasaun ne'ebe espalla iha publiku katak, PM Xanana rezigna-an FRETILIN mos tama iha Governu, Lu-Olo afirma, FRETILIN hakarak atu kontinua opozisaun deit no FRETILIN tenki fo respeita nafatin ba partidu bloku koligasaun ne'ebe mak mais votadu atu hili ninia Xefe Governu foun. 

"Ami labele ezizi fali ba ami nia an hodi ba fera fali iha ne'eba, ne'e labele, maibe ema iha koligasaun ida ne'ebe iha ami respeita tebe-tebes ita nia konstituisaun Governu ida ne'ebe manana sira forma tuir sira nian no ami respeita tebe-tebes tantu ami labele adianta, ami labele hakat rua hakat tolu dala ida," Lu-Olo fundamenta. 

Aktual Prezidenti partidu FRETILIN ne'e akresenta katak, FRETILIN kontinua koopera ho Governu hodi garante ba paz no estabilidade nasional, atu lori rai ida ne'e ba oin. Iha fatin hanesan, Eis Vise Primeiru Ministru (VPM) IV Governu Konstitusional Eng. Mario Viegas Carrascalao esplika katak, Xanana rezigna-an ne'e politika estratejiku ida ne'ebe mak Xanana iha desde luta to'o mai ukun rasik-an. 

"Hau la haree PM Xanana moras mak atu sai hodi rezigna-an, hau la haree PM halo buat ida sala nune'e ema hakarak duni nia sai husi duni ne'eba, hau la haree tanba kestaun legal ne'ebe iha Programa Governu hetan aprovasaun mak nia tenki husu nia rezignasaun, la'os ida ne'e, maibe sai nonok deit ne'e politika estratejiku ida Xanana nian," hateten Mario Carrascalao. 

Nia dehan, Xanana Gusmao ne'e hanesan lider movimentu libertasaun nasional ne'ebe luta ba independensia Timor nian ho promesas atu lori moris ida ne'ebe diak liu ba povu Timor-Leste. 

"Maibe liu tiha tinan 12, nia promesas ne'e la konsege kumpri, I nia rasik sai prezidenti da Republika (PR) la konsege halo saida mak nia ideias ne'e no nia sai tiha husi PR ninia Partidu hetan Primeiru Ministru (PM), maibe ho modelu ezekutivu nia la konsege mesak, nune'e nia tenki halo koligasaun ida ho naran Aliansa maioria Parlamentar (AMP) la susesu hanesan buat balun la'o no buat balun la la'o," hateten Carrascalao. 

 "Partidu barak ne'ebe tama iha AMP ne'e barak mak la hetan fatin entaun halo fali koligasuan ida hodi forma tan V Governu Konstitusional, ne'e dala ikus liu ba PM Xanana atu konsege konkritiza saida mak nia hanoin no nia maluk sira nia hanoin, bainhira kaer kilat ariska sira nia vida atu luta ba ita nia independensia ne'e," tenik Carrascalao. 

Tanba ne'e, Carrascalao akresenta katak, rezignasaun PM Xanana Gusmao ne'e sikuensia husi promesas ne'ebe mak la konsege realiza durante iha nia Governasaun. 

.