“PR Taur: Saudozu Kontenti Wainhira Povu Moris Diak”

.

Jornal Nacional Diario - Segunda-feira, 02 Dezembru 2013

Prezidente Republika (PR) Taur Matan Ruak, hateten saudozu nia mate maka Timor oan sira ohin hetan liberdade total husi okupasaun illegal sira, tanba ne’e saudozu sira kontenti wainhira povu tomak hetan moris diak ona.

 PR Taur dehan, Saudozu sira ne’ebe mate ba rai ida ne’e hakarak Timor oan tomak labele terus tan, labele moris iha susar laran, tanba ne’e kuandu sira haree povu ne’e terus nafatin, sira sei hirus no sira la kontente. Nia dehan, terus ne’ebe mak Timor-oan tomak iha tempu kolonial no mos okupasaun Idonesia durante tinan 24 labele hatutan tan ba jerasaun tuir mai, husik terus tomak to’o deit ona iha jerasaun agora, ba futuru jerasaun sir abele moris hakmatek, paz no moris diak iha sira nia rain rasik.

 “Tersu to’o de’it ita, labele husik terus ba ita nia oan sira, Prezidenti Republika husu ba imi atu servisu maka’as tanba sira husik hela servisu todan ba ita ne’ebe sei moris,” Taur Matan Ruak liu husi nia mensazen ba faluk oan kiak sira no familia saudozu sira nian iha Suku Lelalai, Laisorulai, Sub Distritu Quelekai, Distritu baucau, sabado (30/11).

Restu Mortais ne’ebe mak halibur ona iha Lelalai, laisorulai, sub Distritu Quelekai, Distritu Baucau hamutuk 54. PR Taur hatutan, saudizu sira halo funu atu rai ne’e independensia, ne’ebe liberta ona rai, maibe povu mak seidauk liberta husi mukit nia laran, entaun ba oin PR hakarak fanun ema hotu-hotu atu servisu maka’as liu tan. Antes ne’e, iha Sesta (29/11), Xefe Estadu Taur Matan Ruak presta homenajen ba saudozu sira hamutuk 389 ne’ebe mak komisaun organizadora sub Distritu Uatulari, Distritu Viqueque nia halibur ona no mos Xefe Estadu hato’o hela mensazen badak ba faluk oan kiak sira no familia sira atu banati tuir saudozu sira nia sakrifisiu hodi servisu maka’as ba moris diak.

 “So moris diak mak bele fo honra ba saudozu sira nia mate, tanba sira nia mate hanesan heroi ba nasaun, nasaun tomak no povu tomak hakruk ba sira nia mate,” tenik PR Taur.

Hafoin presta homenazen ba saudozu sira iha Sub Distritu Uatulari, Xefi Estadu, Taur Matan Ruak kontinua partisipa iha serimonia missa agradesementu ba restu mortais no presta homenajen ba saudozu nain tolu (3) Jose Henrique, Selestinho Henrique, Amaro Ribeiro ne’ebe mak familia sira halibur ona Iha Uatulari.

Foto de, Presidência da República de Timor-Leste - Facebook.

.