“Povu TL Ezije Australia Husu Deskulpa”

.

Jornal Independente - Sesta-feira, 06 Dezembru 2013 

Reprejetante povu iha uma fukun Parlamentu Nasional (PN), Sosieade sivil no estudante sira ezije Governu Australia atu husu deskulpa ba Timor-Leste. 

Ezijensia ne’e, hato’o liu husi asaun pasifika, Kinta (05/12) iha embaixada Australia oin, relasiona publikasaun diario ne’e iha Kinta horseik, katak Governu Australia suprota sira nia servisu intelejensia hodi asalta dokumentu advogadu ba Timor-Leste iha prosesu arbitrazen ba tratadu Certaim Maritime Agreement on Timor Sea (CMATS) no halo presaun ba “Whistleblower” ka sasin atu labele halo nia sasin livre. Tuir planu TL ho Australia atu hasoru malu iha Tribunal Internasional iha Deng Haag, Olanda iha loron (5/12), hodi koalia kona ba kazu akuzasaun katak, intelejensia Australia halo espionazen ba edifisiu Governu Timor-Leste iha Dili durante tinan 2004 bainhira nasaun rua ne’e debate hela asuntu lina maritime iha area kampu mina no gas greater Sunrise. 

Nune’e, demonstrante sira konsidera atuasaun intelejensia Australia ne’e nuudar pratika ida ne’ebe la hatudu imajen nasaun ne’ebe iha valor demokrasia, liberdade no moral. 

 Entertantu, Parlamentu Nasional mos hirus Australia atrapalla sidadaun Timor-Leste atu ezije lia los ba sira nia direitu iha asuntu lina Maritima iha area kampu Mina no Gas Greater Sunrise. 

Deputadu Mateus de Jesus husi bancada CNRT hateten, hahalok intelejensia Australia ne’e hatudu momos katak, hakarak koko taka dalan liberdade espresaun ba nasaun seluk hodi hakilar nia direitu. Iha fatin hanesan, membru deputadu bancada Frenti-Mudanca (FM), Maria Adolzinda Pires lamenta no hirus tebes hahalok organizasaun seguransa intelejensia Australia (ASIO) ne’ebe asalta edifisiu advogadu TL. 

“Sira Australia hakarak foti dokumentus para ita TL lakon iha Tribunal arbitrazen hodi eziji ita nia direitu,” dehan nia. 

Nune’e mos, membru bancada Parlamentar Partido Demokratiku (PD) Paulino M. Soares konfesa intelejensia Australia viola ona direitu populasaun TL. 

 “Ami Bancada PD la konkorda atuasaun intelejensia Australia asaltu advogadu ita nian tanba la hatudu pozisaun indisplinar no kolaborasaun ba akordu negosiasaun,” nia lamenta. 

Maski deputadu, sosieade sivil no estudante sira fo reazen makas, maibe Ministru Petroleu no Rekursu MinaRais Alfredo Pires esplika intelejensia husi Australia foti deit dokumentu testamunha fotokopia, maibe dokumentus ne’ebe orizinal Timor Leste haruka ona ba Olanda. 

.