“PNTL Sei Kaptura Grupu Mauk Moruk”

.

Jornal Nacional Diario - Kuarta-feira, 04 Dezembru 2013

Komandante Operasaun Nasional, Policia Nasional Timor Leste (PNTL), Superitendente Xefi Armando Monteiro, promete katak, bazeia ba rezolusaun ne’ebe fo sai husi Governu mak iha tempu badak sira sei halo kapturasaun ba grupu eis Komandante Falintil Paulino Gama ‘Mauk Moruk’ ne’ebe oras ne’e halo movimentu tun sa’e.

 “Rezolusaun Governu iha ona Polisia nia liman, agora dadauk mediasaun la’o hela, hodi nune’e hein katak iha tempu badak operasaun ne’e sei realiza hodi halo kapturasaun no mos prende ba atributu ne’ebe mak Grupu balun uza hodi halo movimentu loron kalan no mos halo atividade seluk hodi halo konfuzaun iha ita nia komunidade nia le’et,” dehan Komandante operasaun nasional Armando Monteiro ba Jornalista sira iha Kuartel jeral PNTL, Caicoli, Dili, Tersa (03/12), bainhira husu kona ba atuasaun saida mak PNTL halo hasoru grupo Mauk Moruk ne’ebe hanarak Konsellu Revolusaun.

 Oras ne’e dadauk populasaun sira sempre koalia no tauk bainhira kona grupo Mauk Moruk nian ne’ebe ameasa atu halo revolusaun hasoru Estadu, tanba grupo ho naran revolusaun ne’e la satisfeitu ho Programa ne’ebe Governu halo ba nasaun ida ne’e.

Tanba ne’e, Armando Monteiro afirma katak, populasaun sira keta hakfodak no trauma tanba Polisia sempre fo seguransa, nune’e nia impaktu maka durante komando Distrital sira halo operasaun konsege prende fardamentu balun no mos balun sira rasik mak volotariamente entrega deit ba Polisia. Tuir komandante ne’e katak, aktividade grupu Mauk Moruk nian ne’ebe uza farda military ne’e kontra lei, tanba iha lei ne’e autoriza deit instituisaun seguransa Defez ahanesan FALINTIL-Forsa Defesa Timor-Leste (F-FDTL) no Polisia Nasional Timor-Leste (PNTL) mak bele utiliza farda maibe kualker sidadaun labele uza.

“Ita hatene katak, lei ne’e autoriza deit instituisaun seguransa defeza mak uza atributus no mos farda military, ne’e mak hakerek iha rezolusaun no lei sira mas aleinde husi instituisaun rua ne’e, organizasaun ka asosiasaun ne’ebe uza atributu military bainhira operasaun polisia nian mak hetan, mak sei prende,” dehan tan Armando Monteiro.

 Antes ne’e iha publiku tomaknia tilun rona katak, Grupu Mauk Moruk nian konsentra hamutuk iha Sub Distritu Laga, Distritu Baucau, maibe oras ne’e dadaun Polisia halo ona operasaun iha fatin refere.

.