“PD Konsidera Komisaun B PN Halo Asaltu Poder”

.

Jornal Independente - Kuarta-feira, 18 Dezembru 2013 

Partidu Demokratiku (PD) lamenta tebes ho atetude membru Komisuan B parlamentu nasional, ne’ebe hatu’un kargu Prezidenti Komisaun B, Maria Lurdes Bessa husi bancada PD ne’ebe la prezensa iha eleisuan ne’e. 

 Prezidenti PD, Adriano Nascimento hateten, eleisaun prezidensial meza komisaun B la lao tuir pratika politika normal no prosedimentu legal iha PN, tanba eleisuan ne’e halo ho emosaun, arrogansia, vigansa politika no interese pesoal. Tanba ne’e, PD lamenta tebes ho eleisuan ne’ebe hala’o iha loron )11/12) tanba votasaun ne’e halo ho forma foti liman deit no la tuir ona pratika politika ne’ebe PN halo hodi vota ba ema liu husi dalan sekretu, dereta no eskrutina. 

 Nia dehan, tuir lolos atu troka prezidenti komisuan tenki iha justifikasaun loloos kona ba eleisuan foun, maibe tanba laiha ne’e duni PD konsidera interese pesoal. 

 “Ami klarifika kartu ne’e hanesan politiku infantile no akta laiha moral etika politika ne’ebe hatudu ba pratika hodi asaltu poder,” tenik Adriano iha Sede PD, Kolmera-Dili, horseik. 

 Iha fatin hanesan, sekretariu jeral PD, Mariano Asanami sabino hateten, PD sei kaer nafatin nia prinsipiu forma governu koligasaun hodi serve povu, ne’ebe PD mantein nafatin hodi servisu hamutuk laos deit ba koligasaun, maibe inklui mos partidu opozisaun. Antes ne’e, Vise Prezidenti Komisaun B parlamentu nasional (PN) Duarte Nunes hateten, iha prosesu votasaun deputadu Maria Bessa la partisipa, tanba bainhira atu halo votasaun deputada ne’e abandona meza hodi lori pasta sai ba liur. 

 Hafoin deputada ne’e sai, membru komisaun B sira sei hein durante oras ida nia laran, maibe tanba deputada bessa lamosu, entaun membru komisaun sira foti desizaun hodi halo eleisaun no ikus mai hili deputadu David Diaz Ximenes Husi bancada FRETILIN mak sau nu’udar prezidenti Komisaun B foun.

.