MOVIMENTU KONTRA OKUPASAUN TASI TIMOR

.

MOVIMENTU KONTRA OKUPASAUN TASI TIMOR

Komunikadu Imprensa

Tinan barak ona Australia nauk rekursu petróleu no gas iha Tasi Timor ne’ebe loloos merese ba Timor-Leste nia soberania tuir prinsipiu lei internasionál nian. Infelizmente Australia uza nia maneira no polítika ne’ebe kanten ne’e hodi halo rai ki’ik no kiak iha rejiaun ne’e tenke lakon nia riku-soin no soberania.

Desde hatene katak iha rezerva petroleu no gas iha Tasi Timor, Australia suporta Indonézia liu dékada rua hodi halo jenosídiu ba povu rai ida ne’e, nauk no sempre uza nia podér ekonomia no polítika ne’ebé maka’as iha rejiaun ne’e atu hanehan ami hodi hariku sira nia povu hodi husik ami nafatin iha kiak nia laran.

Iha loron hirak liu ba, Governu Australia suporta sira nia servisu intelijénsia nian atu ba asalta dokumentu advogadu ba Timor-Leste nian iha prosesu arbitrajen ba Tratadu CMATS (Certain Maritime Arrangement on Timor Sea) no halo presaun ba “whistleblower” ka sasin atu labele halo nia sasin ho livre nudár pratika ida ne’ebé la hatudu imajen nasaun ne’ebé iha valor demokrasia, liberdade no moral. Aleinde ne’e, ukun na’in Australia nian la hatudu sira nia respeita ba povu Timor-Leste, povu ida ne’ebé ki’ik, kiak maibé iha fuan boot ajuda Australia hodi sakrifiika Timor oan na’in 40,000 durante segundu Guerra Mundial hodi hasoru Japaun.

Movimentu Kontra Okupasaun Tasi Timor, ohin husu ba Governu Australia katak:

1.Labele tan nauk no okupa Tasi Timor, maibé tenke hatudu sira nia vontade di’ak nasaun boot ne’ebé sadere ba prinsipiu demokrasia atu deside liña fronteira maritima tuir prinsipiu no lei internasionál.

2.Australia tenke hatudu ezemplu nudár nasaun soberania ida hodi respeita no rekoñese direitu povu Timor-Leste nian.

3.Australia labele promove no kontinua nova-kolonialista ba povu Timor-Leste ne’ebé halo rai ida ne’e sofre durante sékulu barak nia laran. Ami lakohi tan sai atan ba ita-boot sira.

4.Governu Abbot tenke husu deskulpa ba povu Maubere ida ne’e, ne’ebé hetan diskriminasaun boot tebe-tebes husu Australia dezde uluk to’o ohin loron. Karik lae, ami sei kontinua halo manifestasaun ba Embaixada Australia nian durante tempu ne’ebé la determina.

Mak ne’e de’it komunikadu imprensa ida ne’e ami hato’o, no ba atensaun tomak ami hato’o obrigado barak

A Luta Kontinua

Dili 5 Dezembru 2013

Juvinal Dias

Reprezentante Movimentu Kontra Okupasaun Tasi Timor
No Kontaktu 77348703/77126417

.