“L-7 Husu Xanana Ho Mauk Moruk Labele Provoka Malu Tamba Lakohi Mosu Hanesan Krizi 2006”

,

Notisia Husi TVTL - Kinta-Kalan, 05 Dezembru 2013 

Eis komadante Cornelio Gama alias L-7 husu ba jerasaun foun atu kritika jerasaun tuan ho modelu konstrutiva, hato’o ne’e bainhira simu Prezidenti da Republika iha nia rejidensia hodi fo homenazen ba restus mortais. 

 Iha loron 3 fulan ne’e (Dezembru) Prezidenti da Republika hala’o vizita ba restus mortais ne’ebe rekoilidu husi eis kombatentes L-7 hodi fo homenazen ba maluk funu nain hirak ne’e. 

 Hafoin vizita L-7 ba Jornalista TVTL hateten katak, jerasaun tuan sei entrega ukun ba jerasaun foun, tamba ne’e renke kurizi jerasaun tuan. “Sei entrega poder ba jerasaun foun maibe kuandu ami sala imi mos tenki kritika ami, imi (jerasaun foun) la kritika ami sai aat liu tiha, ami hakarak imi mak futuru nia, imi mak sei kaer nasaun, kona ba Xanana, kona ba Mauk sira nia problema uluk ai-laran kedas, husu sira tur hamutuk rejolve atu labele mosu konflitu violensia,” dehan L-7. 

 Veteranus ne’e mos husu ba Povu hotu-hotu atu hakmatek no labele fiar ba rumoris. “Husi loromonu no lorosa’e tenki hakmatek, Lakohi atu akontese hanesan 2006 hodi estraga malu no sasan sira, ida ne’e ita lakohi tamba ezmplu ida ne’e mak estraga nasaun iha 2006, sira tenki tur hamutuk para rejolve, pruzemplu Mauk hanesan hau nia alin, xanana hanesan hau nia komandante, hau mos husu sira 2 tenki tur hamutuk laos ameasa malu iha jornal, ameasa malu iha televizaun, ne’e hanesan provokasaun, husu para povu tur hakmatek e labele hanesan 2006,” dehan tan L-7. 

Kona ba restu mortais hirak ne’ebe destakadu iha eis kombatentes L-7 nia rejidensia ne’ebe seidauk entrega ne’e, Kornelo Gama hateten, sei hein nia planu no dezenhu rasik mak entrega ba estadu. 

.