Julio Tomas Pinto: “Governu Aprova Ona Estatutu Militar”

.

Jornal Nacional Diario - Segunda-feira, 30 Dezembru 2013

Sekretariu Estadu Defeza Julio Tomas Pinto informa katak, Governu aprova ona estatutu militar ne’ebe mak atu defini membrus FALINTIL-Forsa Degeza Timor-Leste (F-FDTL) nia papel ba rezerva ou reforma.

 “Estatutu militar ne’e importante ba F-FDTL tanba ita nia lideransa balun iha F-FDTL ne’e veteranus mos iha ne’eba, entaun presiza ona atu defini sira nia papel nu’udar rezerva ou reforma, tanba tuir lei, idade 55 ba leten ne’e, nia tenki pasa ona ba reforma,” informa Julio Thomas Pinto ba Jornal Nacional Diario iha Aeroportu Internasional Prezidente Nicolau Lobato, Comoro, Dili, Sabadu (27/12), molok dezloka ba rai liur, wainhira husu kona ba balansu prosesu servisu Sekretariu Estadu Defeza (SED) durante tinan ida ne’e.

Nia mos hatutan katak,” Hau hakarak uza oportunidade ida ne’e atu esplika konaba progresu no buat balun ne’ebe mak sala durante tinan ida nia laran, orgaun estadu ida ne’ebe mak servisu hamutuk ho F-FDTL programa hotu-hotu neebe mak trasa tiha ona atravez planu 2020, depois planu dezenvolvimentu forsa armadas nian 2011-2017,” hateten Julio Thomas Pinto.

Alende ne’e, tenik Julio Tomas Pinto, Konselu Ministru mos aprova ona dekretu lei kona ba estatutu Forsas armadas nian. “Ami foin dadauk aprezenta ona ba Konsellu Ministru i aprova tiha ona iha Konsellu Ministru dekreitu lei ida kona ba estatutu Forsa armadas, para defini ona papel Forsas armadas nian no saida mak sai hanesan sira nia dever, ne’e aprova tiha ona, ne’e progresu ida,” hateten Julio Tomas Pinto.

Aleinde ne’e, Julio Tomas Pinto mos rekonese katak, iha buat balun mak seidauk bele la’o.

 “Hau pesoalmente rekonese katak, iha buat lubuk ida mak ita dudu seidauk ba, hanesan prosesu ba reforma ne’e halo nusa, ne’e kompetensia ba F-FDTL ona atu defini, tanba PM rasik husu ona lista para ita hare ba iha sira nia kondisaun ba sira ne’ebe atu reforma, depois iha nivel kordenasaun iha entre forsa armadas, Sekretariu Estadu no mos Ministru Defeza no seguransa mos lao diak, maibe presiza aumenta tan inisiatividade ba iha enkontru ninian, nivel kordenasaun entre estrutura iha parte defeza nian mos presiza hadia, hau hanoin hela atu muda estrutura, tanba agora dadaun ne’e ita iha estrutura diretor jeral ida iha sekretariu Estadu ne’ebe toma konta ba dirasaun hotu-hotu,” Julio Tomas afirma.

Nia dehan tan, Governu mos iha ona hanoin atu muda ou fahe ona Sekretariu Estadu nia dirasaun ne’e ba dirasaun jeral rua.

.