“Garuda Indonesia Sei Semo, Dili Darwin No Bali”

.

Jornal Nacional Diario - Segunda-feira, 30 Dezembru 2013 

Liu husi asina akordu entre Garuda Indonesia ho Air Timor iha 18 Dezembru 2013, iha Jakarta Indonezia kompania rua ne’e konkorda malu atu oferese aviaun Garuda hodi halo operasaun sasemok ba rotas foun Dempasar no Dili ba Darwin, hahu iha 1 Maiu 2014. 

Akordu kompania rua ne’e, nu’udar kontinuasaun ba hametin liu tan negosiasaun ne’ebe mak hala’o ona durante fulan nen (6) ba kotuk. 

 “Air Timor sei uza aviaun ho marka Boeing 737 ne’ebe kompletu ho ekipadu ho fatin ba klase ezekutivu no klase ekonomika ba operasaun nian, espera katak operasaun area ne’e bele komesa 1 maiu 2014, wainhira planeamentu sira ne’e hetan ona aprovasaun husi Governu,” informa Abessy bento iha komunikadu imprensa ne’e. 

Air Timor oras ne’e dadaun hala’o operasaun sasemok entre Dili ba Singapura dala tolu kada semana ho aviaun Silk Air ho nia marka Airbus A319, operasaun ba rotas foun mak Dili ba Dempasar no Dili ba Darwin sei halo sasemok loro-loron. 

 Air Timor mos foin dadauk ne’e, anunsia ona emisaun espesial ba asaun prevensiais ho retornu ida to’o 20% ba investidores Timor Leste (TL), Abessy afirma katak, emisaun ba asaun ida ne’e, sei utiliza ba atu sosa aviaun ida ne’ebe sei halo operasaun domestika iha TL iha 2014. 

Air Timor mos hakarak semo loro-loron ba Dili Oecusse, Suai, Atauro, Maliana, Lospalos, Viqueque no Baucau, no hein katak mehi ne’e bele realiza, wainhira aerodromos sira ne’e estandariza lalais. 

 Durante ne’e aviaun ne’ebe mak halo operasaun area iha Timor Leste (TL) mak hanesan, Merpati semo Dili ba Dempasar, Silk Airlines ba mai Singapura Timor Leste, Airnort ba mai Australia-Dili no Sriwijaya ne’ebe trkoka Batavia Air ba mai Dempasar Dili.

.