“Timor-Leste Laiha Fatin Ba Revolusaun”

,

Jornal Nacional Diario - Tersa-feira, 13 Novembru 2013

Xefi Estadu Taur Matan Ruak ameasa katak, Timor Leste (TL) laiha fatin ba halo revolusaun, so iha deit mak oinsa atu bele kria paz no dezenvolvimentu Timor-Leste hodi moris diak ba povu Timor tomak, maske povu luta nain sira iha foho kontinua moris kiak no mukit.

Meja dialgu ne’ebe lidera diretamente husi eis Primeiru Ministru, actual Sekretario Jeral Partidu FRETILIN, Dr. Mari Alkatiri ne’e, Xefe Estadu husu katak, laiha fatin ba revolusaun maibe iha eleisaun ba partidus politikus sira atu ukun iha tinan lima (5) nia laran, tamba ne’e se mak hakarak ukun kria partidu politika atu bele ukun iha tinan lima-lima mai.

“Hau hanoin Mauk Moruk mai atu ajuda dezenvolve Timor maibe atu halo revolusaun, revolusaun laiha fatin mas iha eleisoens tinan lima-lima, se mak hakarak ukun tinan lima kria partidu, kria partidu konkore para ukun.

Tamba saida ita laiha tempo atu lakon ita nia tempo para halo nusa mak lori paz no dezenvolvimentu ba Timor-oan sira, liu-liu sira ne’ebe fo kontribuisaun maka’as ba funu, ba ita nia nasaun hodi nakfilak ita nia nasaun sai nasaun ida livre no independente maske iha fati-fatin, iha rai lolon, iha foho leten kiak mukit loos,” dehan tan xefe estadu. Tamba ne’e, husik buat ne’ebe la diak aprende deit buat ne’ebe diak atu fo kontribuisaun ba Timor-Leste hodi hateke ba oin.

 “Tamba ne’e hau nia maun L7 iha ne’e, hau nia aman iha ne’e, hakarak atraves katuas hateten ba alin mauk Moruk, iha Timor iha fatin ba Timor oan hotu, laiha ida que sei la hetan fatin iha rai ida ne’e, ita hotu nia avon, inan aman sira moris hotu iha ne’e, fakar hotu ran iha ne’e, hasoru terus no sakrifisio nia-an ba rai ida ne’e, mai ita haree ba oin,” dehan Taur.

 Xefi Estadu dehan, buat ne’ebe iha kotuk partensia ba historia tamba ne’e tempu agora so hakerek para jerasaun foun sira mai, bele aprende historia sira ne’e, tamba agora dalan ida mesak hodi hateke ba oin, kria paz no establidade ba dezenvolvimentu hodi respeita admirasaun povu nian.

 “Povu so admira no respeita ita ba buat ne’ebe ita halo, la’os husi buat ne’ebe ita koalia,” dehan PR Taur.

.