Sidadaun Indonesia Hetan Bolsa Estudu “Bendito: Ita Tenke Haree Ba Evidensia”

.

Jornal Nacional Diario - Kinta-feira, 07 Novembru 2013

Bolseiru ba medisina iha Xina, Joaninha Sequeria neebe hetan bolsa estudu husi Governu Timor Leste (TL), deskonfia laos sidadaun TL, maibe sidadaun Indonesia.

Tanba bolseiru ne’e, ninia inan aman desde tinan 1999, ba hela iha Atambua Indonesia to’o oras ne’e seidauk fila mai Timor Leste. Constancio do Carmo da Costa nuudar professor ida husi Distritu Suai, fo sasin katak, bolseiru ho naran joanina Sequera nia aman ema tentara Indonesia (Mate ona-red), inan Timor husi Distritu Suai Covalima, sei hela iha Atambua, nia hetan bolsa estudu husi koperasaun Governu Xina ho Governu Timor Leste, no nia familia rasik sei iha Atambua,” hateten Costantinho da Costa.

 Maske nune’e Costantinho akresenta katak, nia kestiaona lasignifika atu taka dalan ba nia (Joaninha) maibe diak liu mak fo oportunidade ba Timoroan sira ne’ebe mak hela permanente iha Timor, laos fo fali ba ema sira ne’ebe sidadaun la klaru.

Iha sorumutu ho bolseiru ne’e, Constantino hateten, nia parte konfirma kedas kona ba durasaun estudu bolseiru ne’e nian, no bolseiru ne’e rasik deklara katak, ninia estudu ba area medisina ne’e sei remata iha tinan 2016. Depois fila husi Xina, nia afirma, nia parte konfirma kedas ho bolseiru ninia familia ne’ebe mak iha Suai.

 “Hau konfirma ona ho nia familia sira balun iha Suai, no nia familia dehan, los duni nia familia balun hela iha Timor no nia inan hela iha Atambua,” nia sai sain. Nia mos afirma tan katak,” ita fo oportunidade ba ema ne’ebe laos sidadaun Timor, ba estuda iha rai liur, mas tamba sa make ma Timor labele, los duni katak, nia mos ran Timor, mas nia hela iha ema nia rai, maibe Governu TL haruka ba eskola iha rai seluk, ne’e lalos,” nia kestiaona.

 Nia dehan tan, Bolseiru ne’e aman Tentara, inan Timor maibe hela iha Atambua, hetan benefisiu husi Timor. Hatan ba kesatun ne’e Ministru Edukasaun bendito freitas hateten katak, Governu sei haree fila fali ninia evidensia no faktus konkretas kona ba bolseiru ne’e ninia sidadaun.

Ho faktus konkretu ne’e mak ita bele foti medidas, tanba ita nasaun sberania ida, nasaun seluk la premiti para mai aproveita fali vantazen Timor nian, diak liu ita fob a Timor oan hodi dezenvolve nasaun ne’e rasik,” dehan Bendito freitas.

 Bendito Freitas akresenta tan katak, Ministeriu Edukasaun sei buka tuir faktus konkretu liu husi Embaixador Timor Leste nian iha Xina, liu-liu Ministeriu negosiu Estranjeirus no Kooperasaun (MNEK) hodi identifika realidade ida ne’e.

 “Se nia ema Indonesia entaun ita tenki foti medidas bolseiru ne’e,” hateten Bendito Freitas.

.