Mauk Moruk Hakarak Dialogu Espesial “Sujere Taur, Lere ho L-7 Sai Moderador”

.

Jornal Nacional Diario - Tersa-feira, 26 Novembru 2013

Eis komandante Brigada Vermelha, Paulino Gama ‘Mauk Moruk’ hakarak dialogu especial ne’ebe hala’o iha Kuartel Jeral F-FDTL hodi hakotu problema entre nia (Mauk Moruk-red) ho Xanana Gusmao ne’ebe akontese iha tempo rezistensia.

 Pedido Mauk Moruk nian ne’e veteranus Distritu Baucau hato’o ba Prezidneti Republika, Taur Matan Ruak, Segunda (25/11) horseik iha Palacio Prezidente Bairo Pite, Dili. Pedido ne’e Prezidente Republika, Taur Matan Ruak hatete nia sei estuda, hodi fo resposta iha tempo badak nia laran.

“Uluk debate kona ba Sr. Mauk Moruk ho Primeiru Ministru, (Eis Koamndante das FALINTIL, Kay Rala Xanana Gusmao actual Primeiru Ministru) oinsa mak atu halo aproximasaun par abele evita problema iha komunidade nia leet, ne’e mak ohin Sr. Mauk Moruk nia hanoin hato’o ona ba Sr. Prezidenti da Republika no nia sei fo resposta iha tmepo badak nia laran,” hateten Costodio Belo “Alin Laek” hafoin hamutuk ho veteranu sira husi Distrito Baucau hanesan Cornelio Gama ‘L-7’, L-4, Marito Reis (Eis Sekretariu Estadu veteranus), Liter no Criado hasoru malu ho PR Taur.

Alin Laek ne’ebe akompania husi veteranus Baucau nian, inklui L-7 ne’e hateten, Mauk Moruk nia hakarak mak halo dialogu iha Kuartel Jeral F-FDTL no sujere sai moderador maka xefe Estadu F-FDTL, Maijor jeneral (Maijen) Lere Anan Timur no eis komandante , Cornelio Gama L-7. Iha dialogu ne’e mos, eis komandante Brigada vermelha sujere Amu Bispo Timor-oan nain ida ka rua mak sai observador depois rezultadu dialogu ne’e hakotu ho missa depois publika sai ba publiku.

“Mauk Moruk nia hakarak ne’e halo dialogu iha Kuartel jeneral no nia hakarak Sr. Prezidenti Republika mak atu sai moderador, Sr. Maijen Lere mak sai moderador, no komandante Heli Foho rae boot ‘L-7’ mak hanesan moderador no nia sujere hanesan observador mak Amu Bispo ida ka rua mak marka prezensa iha ne’eba para bainhira hotu, tur hamutuk para buat hotu lao loos, amu bispo ida halo misa para buat hotu ne;ebe mosu hakoi ona, lalika rai tan iha fuan para ema seluk aproveita para sobu rejistensia,” haktuir Alin Laek.

 Iha biban ne’e, Xefe Estadu, Taur Matan Ruak hateten, buat hitu ne’ebe akontese iha tempu funu nian ne’e liga ba estranjeiru ba ukun rasik an, tanba ne’e lider nain rua ne’e (Xanana no Mauk Moruk) inklui mos lider rejistensia sira seluk atu bele tur hamutuk para hakotu tempu pasadu hanoin futuru no garantia estabildiade hodi dezenvolve Timor-Leste ba futuru ne’ebe diak.

Tamba ne’e, nudar veteranu, Alin Laek hateten, problema entre eis komandante Brigada vermelha, Mauk Moruk nia ne’e la’os problema, tamba problema sira ne’e problema funu nian, nune’e iha tempu ukun an laos atu fo kulpa ba malu.

.