“Alfandega Rekonese La Kontrola Farda Militar Ilegal Ba Grupu Mauk-Moruk”

,

Mauk Moruk

Jornal Independente - Segunda-feira, 18 Novembru 2013

Diretora Jeral Alfandega, Brigida da Silva rekonese farda military ne’ebe ema balun lori tama mai Timor-Leste husi rai liur hodi fornese ba grupu eis Komandante Brigada Soque “Mauk Moruk” tanba falta kontrolu diak husi alfandega sira.

Farda ne’ebe grupu Mauk Moruk uza ne’e atu hanesan ho militar Indonesia nian. Tuir nia katak, to’o agora nia parte la simu informasaun husi staff alfandega kona-ba farda military illegal tama liu husi portu Dili ka ou Fronteira batugade. Nia hatutan, makina X-ray ne’ebe Governu Timor-Leste sosa, oras ne’e dadaun balun aat ona no balun deit mak funsiona hodi hala’o kontrolu.

“Makina ne’ebe Governu xina fo sei diak, maibe balun aat ona, agora husu kona ba farda ne’e tama husi ne’ebe, hau mos lahatene,” informa Director Alfandega, iha Delta Nova, Comoro, Dili, Kinta (14/11).

Tuir nia katak, postu integradu alfandega iha Maliana, sira iha membru nain 10 no Suai, Batugade, Oecusse mos menus rekursu ne’ebe tenke aumenta ema professional.

Nia dehan, Makina X-Ray ne’e Governu sosa husi kompania Sinar jaya agora, atu hadia fali makina ne’e maibe sei hein tekniku husi Fabrika mak mai hadia.

 Diretora Brigida mos esplika, tuir lei kilat illegal, ai-moruk droga, labele tama no sasan seluk tan ne’ebe Governu bandu.

.