“Xanana Fo Atensaun Ba Povu Labele Fa’an Rai Ba Ema Estranjeiru”

.

Jornal Independente - Tersa-feira, 29 Outubru 2013

Primeiru Ministru Kay Rala Xanana Gusmao husu ba Povu Timor-leste atu labele faan rai ba ema estranjeiru, tanba konsekuensia todan husi faan rai ne’e sei oho jerasaun tuir mai.

“Hau husu ba administrador Distritu 13, liuliu xefe suku sira labele fa’an rai pedasku ida, fa’an ba ema nain sanulu. Xefe suku sira para fa’an tun e fa’an sa’e,” PM Xanana fo atensaun.

Tuir Primeiru Ministru katak, dala barak maluk sira hakarak halo uma, maibe lakohi fo, no to’o ikus mai mosu problema, hakarak fa’an deit ba ema estranjeiru. “Problema sira ne’e hotu, hau aviza faan rai ne’e sei simu konsekuensia todan ba jerasaun ka oan sira ne’ebe mosu iha jerasaun tuir mai,” dehan xefe Governu bainhira hala’o enkontru ho Administrador no Komandante PNTL Distritu 13, Sub Distritub 65, iha Polisia Akademi (28/10).

Nune’e, xefe Governu husu ba Administrador Distritu, Komandante Distritu, administrador sub Distrito, liliu ba xefe suku sira tenki hanoin no tetu didiak molok fa’an rai ba ema husi rai seluk. “Ita nia maluk sira faan rai ba ema estranjeiru lalais los, maibe familia ho familia problema boot, tanba lideransa lokal sira la bandu populasaun atu faan rai,” dehan Xanana.

Primeiru Ministru deklara kestaun ne’e, tanba PM Xanana toman tiha ona xefe suku balun bosok povu hodi fo sira nia rai hodi faan ba ema estranjeiru. Xanana konsidera xefe suku iha Dili laran mentalidade no imajen la diak, tanba oan sira atu ba hela iha ne’ebe, bainhira ema sosa hotu rai.

Tuir konstituisaun RDTL mos hateten katak, sidadaun estranjeiru laiha direitu atu sain ain ba rai pedasku ida.

.