“Vise MS Lansa Informasaun falsu Ba Publiku”

.

Jornal Independente - Kinta-feira, 17 Outubru 2013

Vise Ministra Saude (MS) asuntu Jestaun no apoiu Rekursu Ministru Saude, Maria do Ceu Sarmento lansa informasaun falsu ba publiku, tanba nates ne’e hateten katak, haruka ona rezultadu investigasaun kazu ‘rujukan’ familia ba Ministru Saude, maibe Ministeriu saude, Sergio Lobo rejeita informasaun ne’e.

Iha loron 5/9 foin lalais ne’e, Vise Ministra Maria deklara katak, rezultadu prosesu investigasaun kona ba kazu ‘rujukan’ hato’o ona ba Ministru saude (MS), Srgio Lobo nia meja leten. Maski nune’e, Ministru Lobo Rejeita total informasaun ne’e, tanba to’o oras ne’e nia rasik seidauk simu dokumentu ruma kona-ba investigasaun kazu ne’e.

 “Hau seidauk simu rezultadu investigasaun, laiha iha hau nia liman no to’o agora sira seidauk informa mai hau,” dehan Ministru Sergio Lobo, iha Sentru Konvensaun Dili (SKD), Kaikoli (16/10). Relasiona ho miss komunikasaun ne’e, komunidade sira lakon konfiansa ba lideransa sira, tanba balun la dun onestu bainhira lansa informasaun ba publiku.

 Arpartio Araujo, komunidade Bairo-Pite hateten, Vise MS durante ne’e hasai deklarasaun falsu, tanba husi nia deklarasaun ne’e la iha ida mak los.

 “Durante ne’e hau mos akompania servisu MS, liu-liu Vise Ministra Maria do ceu nia deklarasaun hau hare laiha faktu, tanba nia mak fo rujukan ba nia familia halo tratamentu iha rai liur, sira mak kria fali ekipa hodi halo investigasaun,” nia hateten.

 Tuir nia, Vise MS mak fo sai deklarasaun hanesan ne’e, ne’e hatudu katak hasai para manipula deit komunidade sira hodi bele sees aan husi lia-loos.

 Iha fatin ketak, estudante UNDIL, Grigorio Diaz hateten, MS durante ne’e manipula informasaun makaas, tanba Vise MS hateten rezultadu investigasaun ba rujukan entrega ona ba Ministru Lobo, maibe nunka komprova faktus.

.