“Universidade Timor seidauk Garante Kualidade”

.

Jornal Independente - Sesta-feira, 18 Outubru 2013

Universidade iha Timor-Leste loke reborebo hanesan keos, maibe seidauk hatudu loloos kualdiade edukasaun hanesan ensinu superior. 

 Vise Ministru Edukasaun Ensinu Superior, Marcal Avelino hateten, universidade barak iha Timor Leste seidauk prinexe padraun nuudar ensino superior, tanba menus kondisaun no rekursu umanus.

 Tuir nia, iha universidade hotu-hotu iha Timor laran tomak, departementu ne’ebe seidauk kualifikadu loloos mak area agrikultura no Direitu, tanba finalista barak iha area ne’e seidauk bele utiliza sira nia asistensia atu halao servisu iha instituisaun ruma.

 “Dirante ne’e sira seidauk bele atu servisu iha instituisaun no asesoria,” dehan Marcal iha serimonia reflesaun hamutuk ho estudante Universitariu, iha Hotel Timor (17/10).

Entertantu estudante UNTL, Zenilton Zeneves ne’ebe partisipa iha reflesaun ne’e, la konkorda ho argumentu Vise Ministru Edukasaun nian, tanba governu mak iha dever boot atu hasae kualidade universidade hotu-hotu no kria kondisaun ne’ebe diak. “Se sira hatene laiha kualidade nusa mak sira fo akreditasaun no fo lisensa para ema sira ne’e harii Universidade,” dehan nia.

 Maski nune’e, nia mos sujere ba Universidade sira atu hadia kualidade, maibe, ME asuntu Ensino Superior mak iha responsabldiade ba universidade iha kualidade ka laiha kualidade.

“Se Ministru hatene iha setor hanesan direitu no agrikultura laiha kualdiade, nia tenki halo avaliasaun no fo rekomendasaun ba sira tenki hadia,’nia lamenta. Nia dehan tan, tuir loloos Ministeriu mak tenki iha planu diak hodi bele orienta Universidade hotu-hotu atu bele hetan kualifikasaun.

.