PRIMEIRA DAMA NO KALBUADI TENKE BA TOBA IHA KOMARKA

.

Opiniaun husi  Oan Kiak

Ita hotu hatene ona katak Prezidenti Taur Matan Ruak nia kaben no Ministru Turismu, sira nain rua hamutuk, ba naok povu nia osan no promove eventu Miss Turismu.

Timor Leste iha fatin barak ba sai atrasaun ba turista sira, maibe nain rua iha leten hakarak bolu turista sira, no oferese ba sira hanesan atrasaun bobot iha ita nia rai, maka feto inosente ( karik feto raan) ba turista sira. Sira hakarak halo Timor hanesan fatin prostituisaun ida ba  bolu turista sira mai? Sira oferese feto raan sira ba malae mai Timor ba halimar ho labarik feto sira?

Isabel mos iha oan feto nain rua, nia la hanoin katak ida ne'e mesak krime ida kontra feto Timor Oan sira? Aban bainrua nia mos ba tau ninia oan feto nain rua ba faan turismu iha Timor-Leste ka lae? 

Karik lae, tanba nia mesak ema opurtunista boot no uza deit feto Timor ba promove ninia aan rasik, nia hamoe deit ninia kaben tanba nia funu tinan barak ba independensia no hakarak diak ba povu no rai doben. Feto ida ne'e moe laiha, halo feto Timor moe deit iha mundu nia leet. Pior liu, hatun feto hotu nia naran no imajen, halo moe ita nia inan no abo sira.

Imi goja ba ho povu mukit ida ne'e, maibe matebian sira sei babeur imi hotu. Keta halimar barak ho rai lulik ida ne'e tanba kastigu boot sei fila fali ba imi.

Tanba sa maka Isabel hamutuk ho Kalbuadi  la rona organizasaun feto Timor Oan sira? Ida ne'e klaru ona, ita lalika kole barak ba hatan kestaun ida ne'e, Isabel mesak ema UDT nian, kolonialista, sempre moris diak,  nunka susar ka hatene povu nia terus no susar, la moris besik povu, nia ema elite opurtunista ida husi Timor, nomos ema arogante ida. Nia aproveita ninia kaben naran boot ba halo aan no halo Timor Oan terus, hamutuk ho ema milisi sira hanesan mau feuk ida ne'e, Fransisco Kalbuadi.

Ita nia povu susar no terus tebes , labarik sira ho tinan liman ba kraik  hamlaha, povu laiha osan ba sosa aimoruk no dala barak mate deit, ita nia oan sira iha eskola tur deit iha rai ba halao sira nia estudu, merenda eskolar labarik sira susar ba hetan no buat barak tan no Kalbualdi no Isabel naok 600 mil dolar amerikanu ba fakar arbiru deit ba halimar konkursu miss turismu? Imi hatete mai hau, ida ne'e maka justisa iha ita nia rain?  Ema opurtunista sira ne'e hanoin katak Timor Oan nia osan sira nia ? Karik sira hanoin katak sira mesak maka Timor-Leste nia na'in.

Osan boot ida ne'e mai husi ne'ebe lolos? Kalbuadi no Isabel Ferreira maka simu husi ninia abo sira, PN maka foo autorizasaun ba sira foti osan boot ida nee, ka sira nain rua mesak mesak deside naok husi povu Maubere? Ida ne'e importante tebes ba ita hotu hatene, tanba se sira naok tenke ba toba iha Gleno ka Bekora, tanba hahalok ida ne'e krime ida hasoru ita nia povu kiak.

Ita hotu tenke hamutuk no halao revolusaun pasifika ida, hodi duni ema oportunista sira ne'e, no hatudu ba sira katak Timor Oan rasik maka na'in ba rain lulik ida ne'e, laos ema milisi hanesan Isabel no mau feuk Kalbuadi.

Povu Maubere tenke hakilar makas no nafatin:

Timor-Leste ita nia!Timor-Leste ita nia! Osan mina rai ita nia! Osan mina rai ita nia! Komarka ba naokten! Komarka ba naokten!

.