“Membru Governu Laiha Planu, Ezekusaun OJE Foin 19%”

.

Jornal Independente - Kinta-feira, 17 Outubru 2013

Ezekusaun Orsamentu Jeral (OJE) ba trimestre da ruak foin mak atinji porsentu sanolu resin sia (19%) ka tokon U$309 husi total U$ 1,7 biliaun, numeru ne’e hatudu katak membru governu sira laiha planu implementasaun programa servisu nian.

Diretor Ezekutivu organizasaun naun Govermental (ONG) Luta Hamutuk, Mericio Akara hateten, OJE ne’ebe membru Governu foin ezekuta to’o 19%, tanba laiha eskala prioridade ne’ebe diak.

Tuir nia, maske iha membru Governu balun ezekuta to’o porsentu tolu nolu (30%), nee duni hatudu katak, kualidade ejekusaun OJE ne’e menus no kapasidade ezekusaun sei problema.

 “Sira (membru Governu) vizita ba rai liur mak barak liu no sira la dun fokus ba servisu iha rai laran, ladun koordena diak ho diretor sira hodi kordena ba karik oinsa ezekusaun lao,” Hateten Mericio, iha nia servisu fatin, Farol-Dili (16/10).

 Aleinde ajenda viazen membru governu ba rai liur ne’ebe barak, Miss komunikasaun no diferensa ideas mos impede ejekusaun OJE. “Tanba partidu ketak-ketak, entaun ida-idak ho ninia interese, ladunu fo orientasaun klaru ba ezekusaun,” tenik nia.

 Planu kada Ministeriu no sekretariu estadu halo ona antes, maibe tanba presaun servisu la diak hodi impede ejekusaun OJE, sira mak halo planu, entaun tenki iha eskala perioridade atu ezekuta uluk ida ne’ebe, tanba sira mos dala ruma konfuzaun atu implementa uluk ida ne’ebe.

Nia fo ezemplu Ministeriu Komersiu Industria no Ambiente (MKIA), planu perioridade mak ida ne’ebe, prioridade ba politika Povu Kuda Governu Sosa ka problema merkadu sira iha Dili laran ka kooperativa produtu lokal no investimentu industria kiik.

Relasiona ho ejekusaun OJE ne’ebe la dun diak, Tuir Mericio, sei hamosu impaktu direita no indereita hanesan projeitu ida la konsege remata bele afeita ba orsamentu ne’ebe la konsege ezekuta no benefisiariu sira la hetan buat ruma.

Antes ne’e, Prezidenti Komisaun C Parlamentu Nasional, Virgilio Marcal konsidera membru Governu sira laiha kapasidade ba ejekusaun OJE ba segundu trimestre 2013, tanba, iha relatoriu ezekusaun OJE ba trimestre da ruak foin atinji 19%.

.