“KFP Investiga FP 800”

.

Jornal Independente - Kuarta-feira, 16 Outubru 2013 

Komisaun Funsaun Publika (KFP) loke ona prosesu investigasaun ba Funsionariu Publiku (FP) na’in 800 ne’ebe komete iha violasaun regra servisu, liu-liu utiliza kareta estadu ba interese privadu. 

 Prezidenti KFP, Liborio Pereira informa kazu violasaun regra servisu ne’ebe FP sira komete barak liu mak uza sala kareta estadu, tama la tuir oras no kazu korupsaun. Kona-ba uza sala kareta estadu, Liborio dehan, FB balun durante ne’e la hala’o sira nia servisu maibe utiliza fali kareta estadu hodi halo viazen ba Distritu. 

“Funsionariu Publiku (FP) balun la servisu mas uza kareta estadu nian ba Distritu depois fila mai Dili, nune’e hela deit,” hateten Liborio iha salaun Joao Paulo II Komoro (14/10). Prezidenti KFP ne’e la esplikadetaillu kazu sleuk ne’ebe FP sira komete, maibe nia dehan deit katak, entrega FP nain 800 ne’e nain 80 hetan ona suspensaun. Liborio informa liu tan, KFP servisu hamutuk ona Diresaun Nasional Transporte no Terrestre (DNTT) no Divizaun tranzito atu halo kontrolu maka’as ba utilizasaun kareta estadu. 

 “Sira sei halo check point ba kareta ne’e, funsionariu mak lori duni ka lae, no hodi halo servisu duni ka lae, inklui mos kuandu funsionariu sira lori kareta ne’e tenki iha autorizasaun husi nia xefe sira,” katak Liborio. 

 Nia mos husu ba kada Ministeriu atu halo kontrolu masimu ba nia funsionariu sira. Entertantu, Liborio husu ba publiku tomak ne’ebe karik haree FP balun utiliza sala kareta estadu atu hato’o keixa maibe presiza mos ho informasaun ne’ebe klaru no evidensia sira hanesan ema nia naran no servisu fatin. 

“Tanba se rona deit kuandu laiha evidensia Komisaun Funsaun Publika labele identifika funsionariu ne’ebe viola regra servisu nian,” katak Liborio.

.