“Hospital Maubisse Menus Ba Ambulansia”

.

Notisia Husi TVTL - Sesta-Kalan, 18 Outubru 2013

Kareta Ambulansia iha Hospital de referensia Maubisse ne’ebe uza hodi tula moras, uza mos hodi tula ema mate, kestaun ne’e hatoo husi Diretor ezekutivu wainhira komisaun F Parlamentu nasional (PN) halao fiskalizasaun iha Hospital Maubisse.

Komisaun F PN ne’ebe trata asuntu saude no edukasaun foin lalais ne’e halao fiskalizasaun ba Hospital de referensia Maubisse. Objetivu husi fiskalizasaun ne’e hodi haree no rona kona ba ezekusaun orsamentu ne’ebe PN aprova ba hospital Maubise atraves husi Ministru da Saude.

Diretor ne’e hateten, durante ne’e hospital esforsu atu fo atendementu ne’ebe diak ba pasiente sira tuir orsamentu no fasilidade ne’ebe iha. Iha fatin hanesan, Vice Prezidenti Komisaun F Duarte Nunes afirma ospital ne’e nia kondisaun diak kompara ho ospital referensia sira seluk, maibe kestaun ambulansia ne’ebe infrenta komisaun sei hato’o ba Ministeriu Solidaridade Sosial.

“Buat ne’ebe ami hare sei falta mak Ambulansia ida kobre fali ba distritu tolu, sub Distritu hira kedas, ida ne’e mak ami senti koalia ho MS atu hare mos kona ba problema ne’e, ami sei koalia molok tama ba debate Orsamentu jeral Estadu 2014 nian,” dehan nia.

 Iha fiskalizasaun ne’e, komisaun mos hala’o obsrvasaun bas ala pasiente hodi hare hahan ne’ebe pasiente sira konsume no sala de operasaun no seluk-seluk tan, komisaun mos hare jerador ne’ebe oras ne’e aat hela.

.