“Xanana: Membru Governu Barak Lahatene Ezekusaun OJE”

.

Jornal Independente - Segunda-feira, 05 Agusto 2013 

Primeiru Ministru Xanana Gusmao foin arepende katak, afinal nia membru Governu barak mak laiha kapasidade ba ezekusaun orsamentu Jeral Estadu (OJE). 

Nune’e, nia parte sei orienta kada membru governu atu ba tuir formasaun sistema finansas iha Ministeriu finansas. Durante tinan ida ba governasaun koligasaun, Primeiru Ministru konfesa la satisfas ho servisu membru Governu V Konstitusional, tanba sei iha obstaklu no dezafiu ne’ebe presiza hadi’a buat barak. 

“Hau ema hotu-hotu hatene, hau nunka satisfeitu ho servisu membru governu, dala ruma ema barak bolu hau inosente demais, balun bolu hau hakarak buat ne’e derepente hadia hotu ona,” dehan nia hafoin enkontru ho Prezidenti Republika, iha Prezidensial Aitarak-Laran, sesta foin lalais ne’e. tuir nia servisu membru governu balun halai neineik liu, nune’e nia dehan servisu membru governu too diak ne’ebe mos nia sei la satisfas. 

Xanana mos informa ona kestaun ne’e ba Prezidenti Republika Taur Matan Ruak atu iha loron 5 to’o 7 fulan-Agusto tinan ne’e membru Governu hotu halo grupu tolu (3) hodi ba simu formasaun iha finansas kona ba sistema finansa. 

Tanba, PM tauk kuandu sistema finansas mak kada membru governu laiha konesementu bele fo impaktu be ezekusaun orsamentu jeral Estadu tinan 2013. 

“Hau haree problema sistema finansas mak halo ami ulun fatuk moras ba malu no ita kontinua la kumpriende tanba ne’e presiza duni kada membru governu tuir formasaun,” dehan Xanana. 

Xanana hatutan tan katak,” Iha loron 9 to’o 11 Agostu, ami halo retiru hodi haree saida mak ami halo ona, difikuldade noa obstaklu saida mak ami tenke hadia para bele hetan dezempnehu diak ida iha tinan oin mai,” dehan nia. 

 Tuir planu Xanana konfesa, iha loron 12 to’o 24 fulan-Agusto sei halo komite revizaun ba orsamentu jeral estadu 2013 hodi deskute fali orsamentu jeral estadu tinan fiskal 2014. 

Antes ne’e, PM Xanana Gusmao ho Eis Primeiru Ministru Mari Alkatiri bolu malu ba bisubisu malu iha casait, Tibar Distritu Likisa. 

Hafoin enkontru, Alkatiri lakohi fo komentariu kona ba objetivu hasoru malu ne’e, maibe nia hateten deit katak, lakohi tau kanoru tohar ba kompetensia PM Xanana ba remodelasaun V Governu Konstitusional. 

.