Tony Blair Hasoru Xanana-Mari “Koalia Projeitu ZEESM”

.

Foto de, Leonia Monteiro

Jornal Nacional Diario - Sesta-feira, 16 Agusto 2013

Eis Primeiru Ministru Englatera, Anthony Charles Lynton Blair ‘Tonu Blair’ kinta (15/8) vizita Timor-Leste (TL) hodi hasoru malu ho Primeiru Ministru actual, Kay Rala Xanana Gusmao no eis Primeiru Ministru, Mari Alkatiri.

 Vizita Tony Blair nian mai Timor-Leste hodi hametin komitmentu kooperasaun pais Englatera ho Timor-Leste ba Zona ekonomia Espesial de Merkado Timor-Leste (ZEESM-TL) nebe projecto piloto sei hala’o iha enclave Oecusse.

“Eis Primeiru Ministru Tony Blair rona mos informasaun kona ba programa oecusse ninian e nia hakarak hatene tan halo nusa mak bele koopera hamutuk ninia team ho hau nia team para koopera hodi ajuda hala’o programa ne’e ba oin, ajuda atu iha nivel internasional i buka tan investidores para hala’o programa ne’e,” Eis PM, Dr. Mari Alkatiri relata asuntu ne’e ba Jornalista sira Kinta (15/8) iha Timor Plaza, Dili hafoin sorumutu.

Alkatiri informa liu tan katak, ekipa ida husi eis PM do reino Unido da Gra Bretanha, Englatera iha tempu badak sei mai Timor-Leste hodi servisu hamutuk ho ekipa husi Eis PM ba asuntu ZEESM.

 “La kleur tan ninia ekipa ida sei mai iha Timor-Leste sira sei loke sira nia office iha ne’e, entaun nia (Tony-red) dehan pronto para ninia ekipa ne’e atu servisu hamutuk ho hau nia rasik para atu halao servisu ne’e ba oin, Tony Blair hateten ida ne’e nia (Tony-red) team sei mai para haree halo nusa mak it abele servisu hamutuk, naturalmente laos deit ba Oecusse Timor Leste ba rejiaun halo nusa mak bele servisu ona,” haktuir Alkatiri.

Iha parte seluk, Eis Primeiru Ministru Tony Blair hafoin hasoru malu ho Primeiru Ministru Xanana ba Jornalista sira katak, Governu Englatera pronto apoiu Timor-Leste iha area infraestrutura.

“Inkontru ho Primeiru Ministru Xanana Gusmao, ita koalia kona-ba koperasaun entre nasaun rua ne’e, li-liu kona ba dezenvolvimentu area infraestrutura, atu ajuda povu nasaun Timor-Leste, ho ninia potensial ne’ebe barak tebes,” dehan Tony Blair ba jornalista sira hafoin halao inkontru ho Primeiru Ministru Kay Rala Xanana Gusmao iha salaun inkontru Ministeriu Financas.

Tony Blair hatutan, sorumutu ho Primeiru Ministru Xanana Gusmao ne’e, koalia kona ba koperasaun dezenvolvimentu iha area infraestrutura, ida ne’e lao ona iha prosesu ida, entre Timor-Leste ho Englatera hodi bele ajuda Timor-Leste iha area oi-oin.

 Toni Blair haktuir, Governu Englatera sei servisu hamutuk iha area oi-oin, hodi dezenvolve area sira ne’e tuir mundu ohin loron. “Ita iha ona idea atu halo buat ruma iha Timor-Leste nee, tanba iha ona ideia, tenki halo tuir idea sira ne’e atu halo buat hotu, ba interese nasuan nian,” afirma Tony Blair.

Aleinde ne’e mos Eis Primeiru Ministru Englatera ne’e mos esklarese katak, importante ba Timor-Leste hein atu tama ba ASEAN, atu bele hetan koneksaun ASEAN sira seluk iha mundu. Kona ba investedor sira nebe atu investe iha ZEESM-Oecusse ne’e, Dr. Mari Alkatiri seidauk bele fo sai ba publiku konaba investedor hira mak atu mai investe.

 “Hau seidauk bele hateten investidores hira, por que hau sei konseilhu servisu nafatin ho Governu para atu aprova leis ba atu halao prosesu ne’e lao ba oin, hau fiar katak bainhira governu, Parlamentu aprova leis, entaun ita bele lao duni ba oin,” Afirma Alkatiri.

Iha oportunidade ne’e mos nia haktuir katak, iha fulan ne’e nia laran nia sei ba Singapura no Macau, tanba hetan konvite hodi halo aprezentasaun ba projeitu Master Plan ne’e.

.