“SES Oferese Uma Nakukun Ba Membru UEP”

.

Jornal Independente - Kuarta-feira, 14 Agusto 2013 

Uma ne’ebe mak Governu liu husi Sekretariu Estadu Seguransa (SES) halo ba Unidade Espesial Polisia (UEP) laiha eletrisidade no fasilidade. 

Adjuntu komandante UEP, Superitendente Damiao da Silva hateten, uma ne’e SES bolu de’it nia hodi asina katak, entrega ba UEP, maibe fasilidade sira hanesan eletrisidade, meza, kadeira no seluk tan laiha. 

“Hau husu ba SES katak, eletrisidade laiha ne’e halo nusa, maibe nia dehan iha kompania seluk mak atu monta, maibe to’o agora laiha,” tenik nia, iha Kuartel UEP, Bairu-Pite, horsehik. 

 Nia hatutan, orsamentu ba konstrusaun uma ne’e de’it mos SES la fo sai ona ba sira, uma ne’e rasik bee dalan de’it mos laiha. 

 “Hau hanon nia lakohi fo sai ba media, tanba nia tauk ADN mai atu sobu uma ne’e, tanba kualidade laiha,” hateten Damiao. 

Adjuntu Komandante ne’e dehan tan katak, to’o agora nia seidauk autoriza membru sira atu hela iha uma ne’e, tanba seidauk iha fasilidade ne’ebe mak bele kompleta tan sira nia servisu.

.